ആലപ്പുഴ: മുതിര്‍ന്ന നേതാവ് ജി. സുധാകരന്‍ എം.എല്‍.എയ്‌ക്കെതിരെ കടുത്ത രാഷ്ട്രീയ നീക്കങ്ങളുമായി സി.പി.എം ആലപ്പുഴ ജില്ലാ നേതൃത്വം രംഗത്ത്. പാര്‍ട്ടി നേതാക്കളെ പൊതുവേദികളില്‍ നിരന്തരം അധിക്ഷേപിക്കുന്നു എന്നാരോപിച്ച് സി.പി.എം നേതാക്കള്‍ സുധാകരന്റെ എം.എല്‍.എ ഓഫിസിലേക്ക് ശക്തമായ പ്രതിഷേധ മാര്‍ച്ച് നടത്തി. അതേസമയം, സുധാകരനെ തെരുവില്‍ വിചാരണ ചെയ്യാനുള്ള നീക്കത്തെ രാഷ്ട്രീയമായി പ്രതിരോധിക്കുമെന്നും ജനങ്ങളും യു.ഡി.എഫും അദ്ദേഹത്തിനൊപ്പമുണ്ടെന്നും എ.ഐ.സി.സി ജനറല്‍ സെക്രട്ടറി കെ.സി വേണുഗോപാല്‍ വ്യക്തമാക്കി.

'വര്‍ഗവഞ്ചകന്‍, യു.ഡി.എഫിനും ബി.ജെ.പിക്കും വിടുപണി ചെയ്യുന്നു': ആര്‍. നാസര്‍

എം.എല്‍.എ ഓഫിസിന് നൂറ് മീറ്റര്‍ അകലെ പൊലിസ് തടഞ്ഞ മാര്‍ച്ചിന് പിന്നാലെ നടന്ന യോഗത്തില്‍ സി.പി.എം ജില്ലാ സെക്രട്ടറി ആര്‍. നാസര്‍ ജി. സുധാകരനെതിരെ കടുത്ത വിമര്‍ശനങ്ങളാണ് ഉന്നയിച്ചത്. സുധാകരന്റേത് എം.എല്‍.എ പദവിക്ക് ചേര്‍ന്ന നിലപാടല്ലെന്ന് അദ്ദേഹം കുറ്റപ്പെടുത്തി.

വര്‍ഗപ്രസ്ഥാനത്തെ തള്ളിപ്പറയുന്ന സുധാകരന്‍ ഒരു 'വര്‍ഗവഞ്ചകന്‍' ആണ്. യു.ഡി.എഫിനും ബി.ജെ.പിക്കും വേണ്ടിയാണ് അദ്ദേഹം ഇപ്പോള്‍ നിലകൊള്ളുന്നത്. സി.പി.എം നേതാക്കള്‍ക്കെതിരെയുള്ള വ്യക്തിഹത്യ തുടര്‍ന്നാല്‍ എം.എല്‍.എ എന്ന പദവി നോക്കാതെ ജനങ്ങള്‍ നേരിട്ട് കൈകാര്യം ചെയ്യും.

രാത്രി പത്തര കഴിഞ്ഞാല്‍ സുധാകരന്റെ സംസാര ശൈലി മാറുമെന്നും, തിരഞ്ഞെടുപ്പില്‍ മത്സരിക്കാതിരുന്നിട്ടും കരാറുകാരില്‍ നിന്ന് പിരിച്ച പണം പാര്‍ട്ടിക്ക് നല്‍കിയിട്ടില്ലെന്നും ജില്ലാ സെക്രട്ടേറിയറ്റംഗം എച്ച്. സലാം ആരോപിച്ചു. സുധാകരന്റെ നാവ് ആണിയടിച്ച് ഉറപ്പിക്കേണ്ടി വരുമെന്ന് ഏരിയ സെക്രട്ടറി സി.കെ ഷാംജിയും മുന്നറിയിപ്പ് നല്‍കി.

ജി. സുധാകരന്‍ ഒറ്റയ്ക്കല്ല, സംരക്ഷിക്കും: കെ.സി വേണുഗോപാല്‍

സി.പി.എമ്മിന്റെ ഫാസിസ്റ്റ് ശൈലിയുടെ തെളിവാണ് ഈ തെരുവ് വിചാരണയെന്ന് കെ.സി വേണുഗോപാല്‍ എം.പി ആരോപിച്ചു. എ.ഡി തോമസ് എം.എല്‍.എയുടെ ഓഫിസ് ഉദ്ഘാടന ചടങ്ങില്‍ സംസാരിക്കുകയായിരുന്നു അദ്ദേഹം.

സി.പി.എമ്മില്‍ നിന്ന് രാജിവച്ച ശേഷമാണ് സുധാകരന്‍ കാര്യങ്ങള്‍ തുറന്നുപറഞ്ഞത്. ഭരണം നല്‍കിയ അഹങ്കാരം ഇപ്പോഴും പാര്‍ട്ടിയെ വിട്ടുപോയിട്ടില്ല. ഒരു ജനപ്രതിനിധിയെ വഴിയില്‍ തടയാനാണ് ഭാവമെങ്കില്‍ അതിനെ യു.ഡി.എഫ് അതീവ ഗൗരവത്തോടെ കാണുമെന്നും അദ്ദേഹം കൂട്ടിച്ചേര്‍ത്തു.

തര്‍ക്കത്തിന് ആധാരമായ നീര്‍ക്കുന്നം സ്‌കൂള്‍ സംഭവം

നീര്‍ക്കുന്നം എസ്.ഡി.വി.ഗവ. യു.പി സ്‌കൂളില്‍ പഴയ കെട്ടിടം പൊളിക്കുന്നതിന്റെ മറവില്‍ വന്‍ അഴിമതിയും മണല്‍ക്കടത്തും നടക്കുന്നുണ്ടെന്ന പരാതിയെത്തുടര്‍ന്ന് ജി. സുധാകരന്‍ എം.എല്‍.എ സ്ഥലം സന്ദര്‍ശിച്ചിരുന്നു. ഈ സമയത്ത് സി.പി.എമ്മുകാരനായ ഗ്രാമപ്പഞ്ചായത്തംഗം എസ്. ഹാരിസും സംഘവും എം.എല്‍.എയുമായി വാക്കേറ്റത്തിലേര്‍പ്പെട്ടു.

സ്‌കൂള്‍ മൈതാനം കുഴിച്ച് കുളമാക്കിയതായും കുട്ടികള്‍ക്ക് ക്ലാസുകള്‍ നടത്താന്‍ കഴിയാത്ത അവസ്ഥയാണെന്നും കാണിച്ച് ജി. സുധാകരന്‍ ആഭ്യന്തരമന്ത്രി രമേശ് ചെന്നിത്തലയ്ക്കും വിദ്യാഭ്യാസ മന്ത്രി എന്‍. ഷംസുദ്ദീനും പ്രത്യേക അന്വേഷണം ആവശ്യപ്പെട്ട് പരാതി നല്‍കിയിട്ടുണ്ട്.

Tensions have flared up in Alappuzha as CPM leaders marched to G. Sudhakaran MLA's office accusing him of defaming the party, while AICC General Secretary K.C. Venugopal extended full support to the MLA against the protest.