ന്യൂഡല്‍ഹി: കണ്ണൂര്‍ അഞ്ചരക്കണ്ടി ഡെന്‍ല്‍ കോളജിലെ വിദ്യാര്‍ഥി നിതിന്‍ രാജിന്റെ ആത്മഹത്യയില്‍ ആരോപണവിധേയനായ അധ്യാപകന്‍ ഡോ. എം.കെ റാമിന്റെ മുന്‍കൂര്‍ ജാമ്യപേക്ഷ സുപ്രിംകോടതി തള്ളി. നേരത്തെ തലശേരി സെന്‍ഷന്‍സ് കോടതിയും കേരള ഹൈക്കോടതിയും റാമിന്റെ മുന്‍കൂര്‍ ജാമ്യാപേക്ഷ തള്ളിയിരുന്നു. 

മനുഷ്യത്വരഹിതമെന്ന വാക്കാണ് മനസില്‍ വരുന്നതെന്നും വിദ്യാര്‍ഥിയെ അധ്യാപകന്‍ മാനസികപീഡനത്തിനിരയാക്കിയെന്നും കോടതി നിരീക്ഷിച്ചു. വിദ്യാര്‍ഥികളോട് അധ്യാപകര്‍ ഇങ്ങനെയാണോ പ്രവര്‍ത്തിക്കേണ്ടത് എന്ന് റാമിന്റെ അഭിഭാഷകനോട് കോടതി ചോദിച്ചു.  പരസ്യമായി നിതിനെ അധിക്ഷേപിച്ചതിന് മൊഴികള്‍ തെളിവായുണ്ടെന്നും കോടതി പറഞ്ഞു. 

നിതിന്റൈ മരണവുമായി ബന്ധപ്പെട്ട് കോളജിലെ വകുപ്പ് മേധാവി ഡോ. റാം, സഹഅധ്യാപിക സംഗീത നമ്പ്യാര്‍ എന്നിവര്‍ക്കെതിരെയാണ് കേസ് രജിസ്റ്റര്‍ ചെയ്തത്. അധ്യാപകരുടെ മാനസിക പീഡനമാണ് നിതിന്‍ ആത്മഹത്യ ചെയ്യാന്‍ കാരണമെന്നാണ് ആരോപണം. കേസില്‍ എം.കെ റാമിനെയും സംഗീതയേയും കോളജ് സസ്‌പെന്‍ഡ് ചെയ്യുകയും റാമിനെ മാനേജ്‌മെന്റ് പുറത്താക്കുകയും ചെയ്തിരുന്നു. 

ഒന്നാംപ്രതി റാം നിരന്തരം നിതിന്‍ രാജിനെതിരേ ജാത്യധിക്ഷേപം നടത്തിയെന്നാണ് പ്രോസിക്യൂഷന്‍ വാദം. ജാതി അതിക്ഷേപത്തില്‍ മനംനൊന്താണ് നിതിന്‍ കോളജ് കെട്ടിടത്തിന്റെ മുകളില്‍നിന്ന് ചാടിയതെന്ന് പ്രോസിക്യൂഷന്‍ വാദിച്ചിരുന്നു. സംഭവ ദിവസം രണ്ടാം പ്രതി ഡോ. കെ.ടി സംഗീത കോളജിലുണ്ടായിരുന്നില്ല. സംഗീതയ്ക്കു വേണ്ടി ഹാജരായ അഭിഭാഷകന്‍ സംഗീത യാത്ര ചെയ്ത ട്രെയിന്‍ ടിക്കറ്റ് ഉള്‍പ്പെടെ കോടതിയില്‍ സമര്‍പ്പിച്ചിരുന്നു. എന്നാല്‍, സംഭവദിവസവും നിതിനെ റാം മാനസികമായി പീഡിപ്പിച്ചെന്നാണ് പ്രോസിക്യൂഷന്‍ വാദം.

പ്രതിചേര്‍ക്കപ്പെട്ട ദിവസം മുതല്‍ ഇരുവരും ഒളിവിലായിരുന്നു. ജാതിയധിക്ഷേപ വകുപ്പില്‍ നിന്ന് ഒഴിവാക്കാന്‍ താനും പട്ടിക വര്‍ഗക്കാരനാണെന്ന സര്‍ട്ടിഫിക്കറ്റ് ഡോ.റാം മുന്‍കൂര്‍ ജാമ്യ ഹരജിക്കൊപ്പം ഹാജരാക്കായിരുന്നു. എന്നാല്‍ റാം ജനിച്ച ബജേന്ത്ര സമുദായം കര്‍ണാടകയിലെ പട്ടികവര്‍ഗ വിഭാഗമല്ലെന്നും ഒ.ബി.സി വിഭാഗത്തില്‍ ഉള്‍പെട്ടതാണെന്നും തെളിവുകള്‍ സഹിതം പ്രോസിക്യൂഷന്‍ കോടതിയില്‍ സമര്‍പ്പിച്ചിരുന്നു.