തിരുവനന്തപുരം: നിയമന ക്രമക്കേടുമായി ബന്ധപ്പെട്ട രേഖകള്‍ വിവരാവകാശ നിയമപ്രകാരം നല്‍കാനാവില്ലെന്ന് കേരള പബ്ലിക് സര്‍വീസ് കമ്മീഷന്‍ (പി.എസ്.സി). രേഖകള്‍ കൈമാറാന്‍ നിര്‍ദേശിച്ച വിവരാവകാശ കമ്മീഷന്റെ ഉത്തരവിനെ നിയമപരമായി ചോദ്യം ചെയ്യാനാണ് പി.എസ്.സിയുടെ തീരുമാനം.

സംസ്ഥാന ആസൂത്രണ ബോര്‍ഡിലെ ചീഫ് തസ്തികയിലേക്കുള്ള പരീക്ഷയുടെ രേഖകള്‍ ഹാജരാക്കണമെന്നായിരുന്നു വിവരാവകാശ കമ്മീഷന്റെ ഉത്തരവ്. പരീക്ഷയില്‍ മൂന്നാം റാങ്ക് നേടിയ ശ്യാം കൃഷ്ണനാണ് വിവരാവകാശ കമ്മീഷനെ സമീപിച്ചത്.

ALSO READ: 'വൈദ്യുതി പ്രതിസന്ധി എപ്പോള്‍ തീരുമെന്ന് പറയാനാകില്ല'; ജലനിരപ്പ് 28% മാത്രം: മന്ത്രി സണ്ണി ജോസഫ് 

സംസ്ഥാന പ്ലാനിങ് ബോര്‍ഡിലെ മൂന്ന് ചീഫ് തസ്തികകളിലേക്കുള്ള പരീക്ഷയിലാണ് ഗുരുതര ക്രമക്കേട് ആരോപണം ഉയര്‍ന്നത്. പരീക്ഷയില്‍ മൂന്നും അഞ്ചും റാങ്ക് നേടിയ ഉദ്യോഗാര്‍ഥികള്‍ മാര്‍ക്കില്‍ സംശയം തോന്നിയതിനെ തുടര്‍ന്ന് വിവരാവകാശ നിയമപ്രകാരം ഉത്തരക്കടലാസുകളുടെ പകര്‍പ്പ് വാങ്ങുകയായിരുന്നു. ഇതോടെയാണ് നിര്‍ണായക വിവരങ്ങള്‍ പുറത്തുവന്നത്.

100 മാര്‍ക്കുള്ള പരീക്ഷയില്‍ 58 മാര്‍ക്കിനുള്ള 10 വിവരണാത്മക ചോദ്യങ്ങള്‍ മൂല്യനിര്‍ണയം ചെയ്യാതെയാണ് പി.എസ്.സി റാങ്ക് പട്ടിക തയ്യാറാക്കിയതെന്നാണ് കണ്ടെത്തല്‍. ഓണ്‍സ്‌ക്രീന്‍ മാര്‍ക്കിങ് സംവിധാനത്തിലെ സാങ്കേതിക തകരാര്‍ മൂലമാണ് ഈ ചോദ്യങ്ങള്‍ മൂല്യനിര്‍ണയത്തിന് പോകാതിരുന്നതെന്നാണ് പി.എസ്.സിയുടെ വിശദീകരണം.

പരീക്ഷ എഴുതിയ 228 ഉദ്യോഗാര്‍ഥികളുടെയും 58 മാര്‍ക്കിന്റെ ചോദ്യങ്ങള്‍ മൂല്യനിര്‍ണയം ചെയ്യപ്പെട്ടിരുന്നില്ലെന്നും പി.എസ്.സി വ്യക്തമാക്കുന്നു. ഇത്രയും മാര്‍ക്ക് പരിഗണിക്കാതെയാണ് റാങ്ക് പട്ടിക പ്രസിദ്ധീകരിച്ചതും, അതിന്റെ അടിസ്ഥാനത്തില്‍ ഒന്നാം റാങ്കുകാരന് ഇതിനകം നിയമനം നല്‍കിയതുമാണ് വിവാദത്തിന് കാരണമായത്.

സംഭവത്തില്‍ അന്വേഷണം നടത്താന്‍ സര്‍ക്കാര്‍ പ്രത്യേക ക്രൈംബ്രാഞ്ച് സംഘത്തെ നിയോഗിച്ചിട്ടുണ്ട്. ഐജി അജിതാ ബീഗത്തിന്റെ നേതൃത്വത്തിലുള്ള സംഘമാണ് കേസ് അന്വേഷിക്കുന്നത്. അന്വേഷണത്തിന്റെ ഭാഗമായി ക്രൈംബ്രാഞ്ചും ആവശ്യമായ രേഖകള്‍ ലഭ്യമാക്കാന്‍ പി.എസ്. സിയോട് ആവശ്യപ്പെട്ടിട്ടുണ്ട്.

The Kerala Public Service Commission (PSC) said it cannot provide documents related to alleged irregularities in appointments under the Right to Information Act. The PSC has decided to legally challenge the order of the Right to Information Commission, which had directed it to hand over the documents.