തിരുവനന്തപുരം: പേരൂര്‍ക്കട സര്‍ക്കാര്‍ മാനസികാരോഗ്യകേന്ദ്രത്തിലെ നിലവിലെ സാഹചര്യം അതീവ ആശങ്കപ്പെടുത്തുന്നതാണെന്ന് കേരള ഹൈക്കോടതി. സ്ഥാപനത്തില്‍ സുരക്ഷാ ജീവനക്കാരുടെ കടുത്ത ക്ഷാമമുണ്ടെന്നും അടിസ്ഥാന സൗകര്യങ്ങള്‍ അടിയന്തരമായി വികസിപ്പിക്കേണ്ട സാഹചര്യമാണെന്നും കോടതി ചൂണ്ടിക്കാട്ടി. ജസ്റ്റിസ് ദേവന്‍ രാമചന്ദ്രനും ജസ്റ്റിസ് ബസന്ത് ബാലാജിയും കേന്ദ്രം നേരിട്ട് സന്ദര്‍ശിച്ച ശേഷമാണ് ഈ നിരീക്ഷണം നടത്തിയത്.              

മാനസികാരോഗ്യകേന്ദ്രത്തില്‍ 158 അറ്റന്‍ഡര്‍മാര്‍ വേണ്ട സ്ഥാനത്ത് നിലവില്‍ 127 പേര്‍ മാത്രമാണുള്ളതെന്ന് കോടതി വിലയിരുത്തി. പാചകത്തൊഴിലാളികളുടെ അഭാവം മൂലം അറ്റന്‍ഡര്‍മാര്‍ തന്നെയാണ് രോഗികളെ പരിചരിക്കുന്നതിനൊപ്പം പാചക ജോലികളും നിര്‍വഹിക്കുന്നത്. സുരക്ഷാ ജീവനക്കാരുടെ കുറവും ജീവനക്കാര്‍ക്ക് ഒന്നിലധികം ചുമതലകള്‍ ഏറ്റെടുക്കേണ്ട സാഹചര്യമുമാണ് നിലവിലെ പ്രതിസന്ധി കൂടുതല്‍ രൂക്ഷമാക്കുന്നതെന്നും കോടതി വ്യക്തമാക്കി.

ALSO READ: ഇന്‍ഡിഗോ വിമാനത്തില്‍ ഇ.പി ജയരാജന്‍ ആക്രമിച്ചെന്ന പരാതി; തുടരന്വേഷണത്തിന് 10 അംഗ പ്രത്യേക സംഘം 

ആശുപത്രിയിലെ പല കെട്ടിടങ്ങളുടെയും നിര്‍മാണം പാതിവഴിയില്‍ നിലച്ചുകിടക്കുകയാണെന്നും കോടതി ചൂണ്ടിക്കാട്ടി. മാനസിക ബുദ്ധിമുട്ടുകള്‍ അനുഭവിക്കുന്ന രോഗികളുടെ ദുരിതങ്ങള്‍ നേരില്‍ കണ്ടതായി പരാമര്‍ശിച്ച കോടതി, അവര്‍ക്ക് സാധാരണക്കാരെപ്പോലെ സ്വന്തം വിഷമങ്ങള്‍ തുറന്നു പറയാന്‍ കഴിയില്ലെന്നും അതിനാല്‍ കൗണ്‍സിലിങ് ഉള്‍പ്പെടെയുള്ള സംവിധാനങ്ങള്‍ ശക്തിപ്പെടുത്തി കുടുംബത്തോടും സമൂഹത്തോടും വീണ്ടും ചേര്‍ന്ന് ജീവിക്കാന്‍ അവസരമൊരുക്കണമെന്നും നിര്‍ദേശിച്ചു.

അറ്റന്‍ഡര്‍മാര്‍, പാചകത്തൊഴിലാളികള്‍, സുരക്ഷാ ഉദ്യോഗസ്ഥര്‍ എന്നിവരുടെ ഒഴിവുകള്‍ നികത്തുന്നതുമായി ബന്ധപ്പെട്ട് സര്‍ക്കാര്‍ സത്യവാങ്മൂലം സമര്‍പ്പിക്കണമെന്നും കോടതി ആവശ്യപ്പെട്ടു. സ്ഥാപനത്തില്‍ ആവശ്യമായ മാറ്റങ്ങള്‍ കൊണ്ടുവരാന്‍ കോടതിക്ക് കഴിയുന്ന എല്ലാ ഇടപെടലുകളും നടത്തുമെന്നും ബെഞ്ച് വ്യക്തമാക്കി.

കഴിഞ്ഞ ദിവസമാണ് ജസ്റ്റിസ് ദേവന്‍ രാമചന്ദ്രന്റെ നേതൃത്വത്തിലുള്ള സംഘം പേരൂര്‍ക്കട മാനസികാരോഗ്യകേന്ദ്രത്തില്‍ നേരിട്ടെത്തി പരിശോധന നടത്തിയത്. ആശുപത്രി പ്രവര്‍ത്തിക്കുന്ന കെട്ടിടങ്ങളുടെ കാലപ്പഴക്കം പരിഹരിക്കുന്നതിനായി 2022ല്‍ സംസ്ഥാന മനുഷ്യാവകാശ കമ്മീഷന്‍ കേന്ദ്രം സന്ദര്‍ശിക്കുകയും മാസ്റ്റര്‍ പ്ലാന്‍ തയ്യാറാക്കി അതിനാവശ്യമായ തുക അടിയന്തരമായി അനുവദിക്കണമെന്ന് ശുപാര്‍ശ ചെയ്യുകയും ചെയ്തിരുന്നു. എന്നാല്‍ തുടര്‍ന്ന് കാര്യമായ നടപടികള്‍ ഉണ്ടായില്ലെന്ന സാഹചര്യത്തിലാണ് ഹൈക്കോടതി നേരിട്ടുള്ള പരിശോധന നടത്തിയത്.

പരിശോധനയ്ക്കിടെ ആശുപത്രിയിലെ അടിസ്ഥാന സൗകര്യങ്ങളുടെ അപര്യാപ്തത, കെട്ടിടങ്ങളുടെ കാലപ്പഴക്കം, ആവശ്യത്തിന് ജീവനക്കാരില്ലാത്തത്, രോഗികള്‍ കഴിയുന്ന സെല്ലുകളുടെ അവസ്ഥ, ആശുപത്രി ഉപകരണങ്ങളുടെ പഴക്കം തുടങ്ങിയ വിഷയങ്ങളിലും കോടതി വിശദമായ വിവരങ്ങള്‍ തേടി.

The Kerala High Court said the current situation at the Government Mental Health Centre in Peroorkada is "extremely concerning."The court pointed out that there is an acute shortage of security staff at the institution and that basic infrastructure needs to be developed urgently.