കോഴിക്കോട്: സംസ്ഥാനത്ത് അമീബിക് മസ്തിഷ്‌ക ജ്വരം ബാധിച്ച് വീണ്ടും മരണം റിപോര്‍ട്ട് ചെയ്തു. കോഴിക്കോട് മെഡിക്കല്‍ കോളജ് ആശുപത്രിയിലെ തീവ്രപരിചരണ വിഭാഗത്തില്‍ ചികിത്സയിലായിരുന്ന കൊയിലാണ്ടി നടേരി സ്വദേശി ബിജുവാണ് (49) മരണത്തിന് കീഴടങ്ങിയത്.

രോഗം സ്ഥിരീകരിച്ചതിനെ തുടര്‍ന്ന് കഴിഞ്ഞ കുറച്ചു ദിവസങ്ങളായി ഇദ്ദേഹം വിദഗ്ധ ചികിത്സയിലായിരുന്നു. ബിജു അടുത്തിടെ പ്രദേശത്തിന് പുറത്തുപോവുകയോ പൊതു ജലാശയങ്ങളില്‍ ഇറങ്ങുകയോ ചെയ്തിട്ടില്ലെന്നാണ് പ്രാഥമിക അന്വേഷണത്തില്‍ വ്യക്തമാകുന്നത്. അതിനാല്‍ തന്നെ രോഗബാധയുടെ ഉറവിടം സംബന്ധിച്ച് ആരോഗ്യവകുപ്പ് അന്വേഷണം ഊര്‍ജ്ജിതമാക്കുകയും പ്രദേശത്ത് ശക്തമായ പ്രതിരോധ നടപടികള്‍ ആരംഭിക്കുകയും ചെയ്തിട്ടുണ്ട്.

നൈഗ്ലേറിയ ഫൗളേറി, അക്കാന്തമീബ തുടങ്ങിയ ഭീകരരായ സൂക്ഷ്മജീവികളാണ് മനുഷ്യരില്‍ ഈ മസ്തിഷ്‌ക ജ്വരത്തിന് കാരണമാകുന്നത്. ഇതില്‍ നൈഗ്ലേറിയ ഫൗളേറി ബാധിച്ചാല്‍ 99 ശതമാനവും അക്കാന്തമീബ മൂലമുള്ള രോഗബാധയില്‍ 70 മുതല്‍ 90 ശതമാനം വരെയുമാണ് ഉയര്‍ന്ന മരണനിരക്ക് രേഖപ്പെടുത്തുന്നത്. കഠിനമായ പനി, പെട്ടെന്നുണ്ടാകുന്ന തലവേദന, ഛര്‍ദ്ദി, കഴുത്ത് നിവര്‍ത്താനുള്ള പ്രയാസം, ബോധക്ഷയം, വെളിച്ചത്തിലേക്ക് നോക്കാനുള്ള ബുദ്ധിമുട്ട് എന്നിവയാണ് ഈ രോഗത്തിന്റെ പ്രധാന ലക്ഷണങ്ങള്‍.

A 49-year-old man from Koyilandy passed away at Kozhikode Medical College due to primary amebic meningoencephalitis, triggering health authorities to intensify preventive measures in the area.