മലപ്പുറം: നഗരസഭയിലെ താമരക്കുഴി വാര്‍ഡ് ആരോഗ്യ ശുചിത്വ കമ്മിറ്റിയുടെ ആഭിമുഖ്യത്തിലുള്ള 'പ്ലാസ്റ്റിക് വേണ്ട, ആരോഗ്യം മതി' ക്യാംപയിന്‍ ഒക്ടോബറില്‍ ആരംഭിക്കും. ബോധവല്‍ക്കരണത്തിനു പുറമേ പ്ലാസ്റ്റിക് ഉപയോഗം കുറക്കുന്നതും പ്ലാസ്റ്റിക് സഞ്ചികള്‍ ശേഖരിച്ച് കൊണ്ടുപോകുന്നതുമാണ് പദ്ധതി. ക്യാംപയിന്റെ ഭാഗമായി വാര്‍ഡിലെ മുന്നൂറോളം കുടുംബങ്ങള്‍ക്ക് സൗജന്യമായി തുണി സഞ്ചി വിതരണം ചെയ്യും. ഒഴിവാക്കിയ പ്ലാസ്റ്റിക് സഞ്ചികള്‍ ശേഖരിക്കാന്‍ ഓരോ വീട്ടുകാര്‍ക്കും പ്ലാസ്റ്റിക് ബക്കറ്റുകള്‍ സൗജന്യമായി നല്‍കും.
ക്യാംപയിന്റെ ലോഗോ പ്രകാശനം നഗരസഭാ ചെയര്‍പേഴ്‌സണ്‍ സി.എച്ച് ജമീല ടീച്ചര്‍ നിര്‍വഹിച്ചു. വാര്‍ഡ് കൗണ്‍സിലര്‍ ഹാരിസ് ആമിയന്‍ അധ്യക്ഷനായി. മുനിസിപ്പല്‍ കോഡിനേറ്റര്‍ സി.എ റസാഖ് മാസ്റ്റര്‍, അക്ഷയ മാനേജര്‍ സി.എച്ച് അബ്ദുസ്സമദ്, അബ്ദുല്‍ ഖാദര്‍ കരടിക്കല്‍, പി.ടി അക്മല്‍ ബാബു, എ.ഡി.എസ് പ്രസിഡന്റ് ഇ.കെ രഞ്ജിനി സംസാരിച്ചു.