ഫറോക്ക്: നാടോടി സ്ത്രീയുടെ മരണം പേവിഷബാധയേറ്റാണെന്ന അഭ്യൂഹത്തെ തുടര്‍ന്ന് മണ്ണൂരിലെയും പരിസരപ്രദേശങ്ങളിലെയും ജനങ്ങള്‍ ആശങ്കയില്‍. ജനങ്ങളുടെ ഭീതിയകറ്റാനായി ഇന്നു രാവിലെ 11നു പഞ്ചായത്ത് അധികൃതര്‍ ആരോഗ്യ വകുപ്പ്, രാഷ്ട്രീയ പാര്‍ട്ടി പ്രതിനിധികള്‍ എന്നിവരുടെ സംയുക്ത യോഗം വിളിച്ചുചേര്‍ത്തിട്ടുണ്ട്.
ലക്ഷ്മിയെന്ന നാടോടി സ്ത്രീയെ മാസങ്ങള്‍ക്കു മുന്‍പാണു കടയുടെ വരാന്തയില്‍ കിടന്നുറങ്ങവെ തെരുവുനായ കടിച്ചത്. തുടര്‍ന്നു രോഗി വിദഗ്ധ ചികിത്സ തേടിയിരുന്നില്ല. ഏറെ വൈകി ഇവര്‍ക്കു പേവിഷബാധ കണ്ടെത്തിയ ഉടന്‍ മരണം സംഭവിക്കുകയായിരുന്നു.