കോഴിക്കോട്: ബി.ജെ.പി ദേശീയ കൗണ്‍സില്‍ യോഗത്തില്‍ പങ്കെടുക്കാനായി ദേശീയ അധ്യക്ഷന്‍ അമിത്ഷാ നാളെ കോഴിക്കോട്ടെത്തും. രാവിലെ 11 നു കരിപ്പൂരില്‍ വിമാനമിറങ്ങുന്ന അമിത്ഷാ  കടവ് റിസോര്‍ട്ടില്‍ താമസിച്ച് ദേശീയ കൗണ്‍സിലിന്റെ ഒരുക്കങ്ങള്‍  വിലയിരുത്തുമെന്ന് സംസ്ഥാന ജനറല്‍ സെക്രട്ടറി കെ സുരേന്ദ്രന്‍ വാര്‍ത്താ സമ്മേളനത്തില്‍ പറഞ്ഞു. ദേശീയ കൗണ്‍സില്‍ സമ്മേളനത്തില്‍ പങ്കെടുക്കുന്നതിനായി പ്രധാനമന്ത്രി നരേന്ദ്രമോദി 24ന് എത്തും. 3.45ന് കരിപ്പൂരില്‍ വിമാനമിറങ്ങുന്ന അദ്ദേഹം വൈകിട്ട് അഞ്ചിന് കടപ്പുറത്തെ പൊതുസമ്മേളന വേദിയില്‍ എത്തും. ആറു മണിക്ക് ഗസ്റ്റ് ഹൗസിലേക്ക് പോകുന്ന പ്രധാനമന്ത്രി തുടര്‍ന്ന് പഴയകാല ജനസംഘം പ്രവര്‍ത്തകരെ ആദരിക്കുന്ന പരിപാടിയില്‍ പങ്കെടുക്കും. 25ന് രാവിലെ മുതല്‍ വൈകിട്ട് എട്ടുവരെ  സ്വപ്നനഗരിയില്‍ പ്രധാനമന്ത്രി ഉണ്ടാകും.