തിരൂര്‍: പ്രവര്‍ത്തിച്ചുകൊണ്ടിരിക്കെ ടെലിവിഷന്‍ പൊട്ടിത്തെറിച്ചു. തിരൂര്‍ മുത്തുരിലാണ് സംഭവം. മുത്തൂരിലെ വെളിയമ്പാട്ട് നാസറിന്റെ വീട്ടിലെ ടെലിവിഷനാണ് പൊട്ടിത്തെറിച്ചത്. ചുമരില്‍ സ്ഥാപിച്ച എല്‍.സി.ഡി ടിവിയില്‍ നിന്നു  പുക ഉയരുന്നത് ശ്രദ്ധയില്‍പ്പെട്ട കുടുംബാംഗങ്ങള്‍ വീടിന് പുറത്തേക്കിറങ്ങിയതിനാല്‍ ആളപായം ഒഴിവായി. വീട്ടുകാര്‍ ഒന്നിച്ചിരുന്ന് ടിവിയില്‍ പരിപാടികള്‍ കണ്ടു കൊണ്ടിരിക്കുന്നതിനിടെയാണ് അപകടമുണ്ടായത്.
ടെലിവിഷന്‍ പൂര്‍ണമായും കത്തിക്കരിഞ്ഞു. രണ്ടു വര്‍ഷം മുമ്പ് വാങ്ങിയ പ്രമുഖ കമ്പനിയുടെ എല്‍.സി.ഡിയാണ് പൊട്ടിത്തെറിച്ചത്.
വീട്ടിനുള്ളിലെ ഫര്‍ണിച്ചറുകള്‍ക്കും തീ പിടിച്ചെങ്കിലും വീട്ടുകാര്‍ പെട്ടെന്ന് തന്നെ അണക്കുകയായിരുന്നു. കമ്പനി അധികൃതരുമായി ബന്ധപ്പെട്ടപ്പോള്‍ മാറ്റി നല്‍കാമെന്ന് അറിയിച്ചതായി വീട്ടുകാര്‍ പറഞ്ഞു.