തെലങ്കാന : ഇടിയേറ്റ് മുകളില്‍ വീണ യുവാവുമായി കാര്‍ സഞ്ചരിച്ചത് മൂന്ന് കിലോമീറ്റര്‍ !. തെലങ്കാനയിലെ മെഹബൂബ് നഗറില്‍ കഴിഞ്ഞ ദിവസം രാത്രിയായിരുന്നു യുവാവിന്റെ ജീവനെടുത്ത സംഭവം. അമിത വേഗതയിലെത്തിയ കാര്‍ യുവാവിനെ ഇടിച്ചു തെറിപ്പിക്കുകയായിരുന്നു. കാറിനു മുകളിലേക്കു തെറിച്ച യുവാവിനേയും കൊണ്ട് അതേ കാര്‍ മൂന്നു കിലോമീറ്ററോളം മുന്നോട്ടുപോയ ശേഷമാണ് നിര്‍ത്തിയത്.

[caption id="attachment_113458" align="aligncenter" width="600"] യുവാവിനെ ഇടിച്ച കാര്‍[/caption]

മെഹബൂബ് നഗറില്‍ റോഡ് മുറിച്ചു കടക്കുകയായിരുന്ന 35കാരനായ ശ്രീനിവാസുലുവിനെയാണ് അമിത വേഗതയിലെത്തിയ ഷെവര്‍ലേ ബീറ്റ് കാര്‍ ഇടിച്ചു തെറിപ്പിച്ചത്. ഇടിയുടെ ആഘാതത്തില്‍ യുവാവ് കാറിനു മുകളിലേക്ക് തെറിക്കുകയായിരുന്നു. എന്നാല്‍, സംഭവമറിഞ്ഞിട്ടും ഡ്രൈവര്‍ കാര്‍ നിര്‍ത്താതെ വേഗത കൂട്ടി യാത്ര തുടര്‍ന്നു. സംഭവം ശ്രദ്ധയില്‍പെട്ട നാട്ടുകാര്‍ കാര്‍ പിന്തുടര്‍ന്ന് തടഞ്ഞു. തുടര്‍ന്ന് കാര്‍ നിര്‍ത്തിയ ഡ്രൈവര്‍ ഓടി രക്ഷപ്പെട്ടു. അപ്പോഴേക്കും കാറിനു മുകളില്‍ രക്തം വാര്‍ന്ന് യുവാവ് മരിച്ചിരുന്നു. ഹൈരാബാദുകാരനായ രാജശ്രീ റെഢ്ഡിയാണ് കാറോടിച്ചതെന്ന് പൊലിസ് അറിയിച്ചു.