കോഴിക്കോട്: കുറ്റ്യാടിയിലെ കടന്തറ പുഴയിലെ മലവെള്ളപ്പാച്ചിലില്‍ കാണാതായവരിലെ ആറാമത്തെ മൃതദേഹവും കണ്ടെടുത്തു.കോതോട് സ്വദേശി വിഷ്ണുവിന്റെ മൃതദേഹമാണ് ഇന്ന് ലഭിച്ചത്. എക്കല്‍ പ്രദേശത്തെ പാറക്കെട്ടിനു സമീപത്തുനിന്നാണ് ഇന്ന് രാവിലെ മൃതദേഹം ലഭിച്ചത്. ഇതോടെ അപകടത്തില്‍ കാണാതായ അവസാനത്തെ ആളുടെ മൃതദേഹവും ലഭിച്ചു. അപകടത്തില്‍ ആറു പേരാണ് മരണപ്പെട്ടത്.
ആറു പേരെയാണ് കഴിഞ്ഞ ഞായറാഴ്ച കടന്തറ പുഴയിലെ മലവെള്ളപ്പാച്ചിലിലെ ഒഴുക്കില്‍പെട്ട് കാണാതായിരുന്നത്. അപകടം നടന്ന സ്ഥലത്തു നിന്നും എട്ട് കിലോമീറ്റര്‍ ചുറ്റളവിലാണ് തെരച്ചില്‍ നടത്തിയിരുന്നത്.
തൃശൂരില്‍ നിന്നെത്തിയ കേന്ദ്ര ദുരന്ത നിവാരണ സേനയുടേയും ഫയര്‍ ഫോഴ്‌സ്,പൊലിസ്,നാട്ടുകാര്‍ എന്നിവരുടെ നേതൃത്വത്തിലായിരുന്നു രക്ഷാപ്രവര്‍ത്തനം നടത്തിയത്. അവസാനത്തെ മൃതദേഹവും ലഭിച്ചതോടെ തിരച്ചില്‍ അവസാനിപ്പിച്ചു.