ശ്രീകാര്യം : ആക്കുളം നിഷിനു സമീപം കുറ്റിക്കാട്ടില്‍ വന്‍തീപ്പിടിത്തം. പരിസരവാസികള്‍ മണിക്കൂറുകളോളം പരിഭ്രാന്തിയിലായി.
ഇന്നലെ വൈകുന്നേരം ആറ് മണിയോടെ നിഷിന്റെ നിര്‍മാണ പ്രവര്‍ത്തനങ്ങള്‍ നടക്കുന്നതിന് സമീപമുള്ള ചതുപ്പു നിലത്തിലെ ഒരാള്‍ പൊക്കമുള്ള കുറ്റിക്കാട്ടിലാണ് ആദ്യം തീപ്പിടിച്ചത്. ശക്തമായി കാറ്റുണ്ടായിരുന്നതിനാല്‍ തീ മറ്റു
സ്ഥലങ്ങളിലേക്ക് ആളിപ്പടരുകയായിരുന്നു. നിഷ് അധികൃതരും, സമീപമുള്ള ഫ്‌ളാറ്റിലെ താമസക്കാരും ഫയര്‍ഫോഴ്‌സിനെയും പൊലിസിനെയും വിവരമറിയിച്ചു.
ആദ്യം സ്ഥലത്തെത്തിയ ഫയര്‍ഫോഴ്‌സിന്റെ ഒരു യൂനിറ്റ് തീ അണയ്ക്കാന്‍ ശ്രമിച്ചെങ്കിലും ആഴമുള്ള ചതുപ്പുനിലമായതിനാല്‍  വിജയിച്ചില്ല. തുടര്‍ന്ന് ചെങ്കല്‍ച്ചൂള്ള, ചാക്ക, കഴക്കൂട്ടം, തുടങ്ങിയ സ്റ്റേഷനുകളില്‍ നിന്ന്  കൂടുതല്‍ യൂനിറ്റുകളെത്തിയെങ്കിലും ചതുപ്പ് നിലത്തില്‍ ഇറങ്ങാന്‍ കഴിയാത്തതിനാലും വെളിച്ചമില്ലാത്തതിനാലും തീ നിയന്ത്രണവിധേയമാക്കാന്‍ കഴിഞ്ഞില്ല. നിഷിനു സമീപം സംസ്ഥാന സര്‍ക്കാര്‍ ആക്കുളം കണ്‍വെന്‍ഷന്‍ സെന്ററിനു വേണ്ടി ഏറ്റെടുത്തിരിക്കുന്ന 55 ഏക്കര്‍ സ്ഥലത്തെയും അതിനോട് ചേര്‍ന്ന് കിടക്കുന്ന നിഷിന്റെ അധീനതയിലുള്ള സ്ഥലത്തെയും കുറ്റിക്കാടുകളാണ് കത്തിയത്.  
തീ ആളിപ്പടര്‍ന്നതിനാല്‍ സ്ഥലത്തെ നിരവധി മരങ്ങളും അഗ്‌നിക്കിരയായി. നിഷിനെ കൂടാതെ ഇതിനു സമീപത്തു  സ്ഥിതി ചെയ്യുന്ന ഗുഡ് ഷെപ്പേര്‍ഡ് സ്‌കൂള്‍, സ്വകാര്യ ഫ്‌ളാറ്റുകള്‍ എന്നിവിടങ്ങളിലേക്ക് തീ പടരാതിരിക്കാന്‍ ഇവിടെ  ഫയര്‍ഫോഴ്‌സ് സംഘവും, ശ്രീകാര്യം പൊലിസും നിലയുറപ്പിച്ചിരുന്നു.
മെഡിക്കല്‍ കോളജ് സി.ഐ. ബിനുകുമാര്‍, ശ്രീകാര്യം എസ്.ഐ. അനൂപ് കൃഷ്ണ, ഫയര്‍ഫോഴ്‌സ് അംഗങ്ങളും രാത്രി വൈകിയും തീ അണയ്ക്കാന്‍ ശ്രമിക്കുകയാണ്.