കാസര്‍കോട്: കാറില്‍ കടത്തുകയായിരുന്ന പാക്കറ്റ് മദ്യവും കുപ്പിയിലുള്ള കര്‍ണാടക നിര്‍മിതമദ്യവും പിടികൂടി. മദ്യം കടത്തുകയായിരുന്ന പ്രതി പൊലിസിനെ കണ്ട് ഓടി രക്ഷപ്പെട്ടു. വ്യാഴാഴ്ച രാത്രി 11 മണിയോടെ നെല്ലിക്കുന്നു ശാന്താ ദുര്‍ഗാംബ റോഡില്‍ വച്ചാണു മദ്യം പിടികൂടിയത്.
കെ.എ 19 എം.എ 4338 നമ്പര്‍ റിട്‌സ് കാറില്‍ കടത്തുകയായിരുന്ന മദ്യം കാസര്‍കോട് സി.ഐ സി.എ അബ്ദുല്‍ റഹീമിനു ലഭിച്ച രഹസ്യ വിവരത്തിന്റെ അടിസ്ഥാനത്തില്‍ കാസര്‍കോട് ടൗണ്‍ എസ്.ഐ വരുണ്‍ ജി കൃഷ്ണന്റെ നേതൃത്വത്തിലുള്ള സംഘമാണു പിടികൂടിയത്.
പൊലിസിനെ കണ്ടതോടെ കാര്‍ നിര്‍ത്തി ഡ്രൈവര്‍ ഓടി രക്ഷപ്പെടുയായിരുന്നു. എസ്.ഐ വരുണ്‍ ജി കൃഷ്ണന്‍, അഡിഷണല്‍ എസ്. ഐ നാരായണന്‍, സീനിയര്‍ സിവില്‍ പൊലിസ് ഓഫിസര്‍ ബാബു, ഡ്രൈവര്‍ രാജേഷ് എന്നിവരാണു മദ്യം പിടികൂടിയ സംഘത്തിലുണ്ടായിരുന്നത്. പ്രതിയെ പിടികൂടാനുള്ള ഓട്ടത്തിനിടെ ഡ്രൈവര്‍ രാജേഷിനു വീണു പരുക്കേറ്റു.
ഫ്രൂട്ടി പാക്കറ്റ് രൂപത്തിലുള്ള 144 പാക്കറ്റ് മദ്യവും 180 മില്ലി ലിറ്റര്‍ വരുന്നന്റെ 48 കുപ്പി മദ്യവുമാണ് പിടികൂടിയത്. കര്‍ണാടകയില്‍ മാത്രം വില്‍ക്കാന്‍ ലൈസന്‍സുള്ള മദ്യമാണു പിടികൂടിയതെന്ന് പൊലിസ് പറഞ്ഞു. മദ്യം കടത്തിയ പ്രതിയെ തിരിച്ചറിഞ്ഞതായും പ്രതിക്കു വേണ്ടി തിരച്ചില്‍ നടത്തുന്നതായും പൊലിസ് പറഞ്ഞു.