കാസര്‍കോട്: ഇന്ത്യന്‍ റെയില്‍വേയുടെ ശുചിത്വ കാംപയിന്റെ ഭാഗമായി കാസര്‍കോട് റെയില്‍വേ സ്റ്റേഷന്‍ ശുചീകരണത്തിനു കുട്ടിക്കൂട്ടമിറങ്ങി. ഒരു മണിക്കൂര്‍ നേരം കൊണ്ട് കുട്ടികള്‍ റെയില്‍വേ സ്റ്റേഷന്‍ പരിസരം ശുചിയാക്കി മടങ്ങി. കാസര്‍കോട് മെഡോണ എ.യു.പി സ്‌കൂളിലെ 75 ഓളം വിദ്യാര്‍ഥികളാണ് ഇന്നലെ റെയില്‍വേ സ്റ്റേഷന്‍ ശുചീകരണത്തിന് അരയും തലയും മുറുക്കി ഇറങ്ങിയത്. രാവിലെ 11 മണിയോടെ അധ്യാപകരോടൊപ്പം എത്തിയ വിദ്യാര്‍ഥികള്‍ റെയില്‍വേ അധികൃതരുടെയും റെയില്‍വേ പൊലിസിന്റെയും അനുമതിയോടെയാണു സ്റ്റേഷനും പരിസരവും വൃത്തിയാക്കിയത്.
പരിസരം വൃത്തിയാക്കി റെയില്‍വേ അധികൃതരുടെ ഗുഡ് സര്‍ട്ടിഫിക്കറ്റും നേടിയാണു വിദ്യാര്‍ഥികള്‍ മടങ്ങിയത്. കുട്ടികളുടെ ആവേശം കണ്ടപ്പോള്‍ റെയില്‍വേയുടെ ശുചീകരണ തൊഴിലാളികളും റെയില്‍വേ പൊലിസും കുട്ടികളോടൊപ്പം കൂടി. ഇതോടെ ഒരു മണിക്കൂര്‍ നേരം കൊണ്ടു സ്റ്റേഷന്‍ പരിസരം വെടിപ്പായി.
റെയില്‍വേ സീനിയര്‍ ഡിവിഷന്‍ മാനേജര്‍ ഷാജു റോയ്, സീനിയര്‍ മാനേജര്‍മാരായ വി.കെ പാത്തൂര്‍, കെ മോളി, സ്റ്റേഷന്‍ മാസ്റ്റര്‍മാരായ വിനോദ്, രാഘവന്‍, റെയില്‍വേ പൊലിസ് എസ്.ഐ കെ വിജയന്‍, സ്‌കൂള്‍ പ്രധാനധ്യാപിക സിസ്റ്റര്‍ റോസ്‌ന തുടങ്ങിയവരുടെ നേതൃത്വത്തിലാണു ശുചീകരണ പ്രവൃത്തി നടന്നത്.