കൊല്ലം: പാരിപ്പള്ളിമെഡിക്കല്‍ കോളജ് അട്ടിമറിക്കുന്നതിനുള്ള മെഡിക്കല്‍ വിദ്യാഭ്യാസ വകുപ്പിലെയും ഇ.എസ്.ഐ കോര്‍പ്പറേഷനിലെയും ഒരു വിഭാഗം ഉദ്യോഗസ്ഥരുടെ ഗൂഢനീക്കത്തെക്കുറിച്ച് ഉന്നതതല
അന്വേഷണം നടത്തണമെന്നു എന്‍.കെ പ്രേമചന്ദ്രന്‍ എം.പി വാര്‍ത്താസമ്മേളനത്തില്‍ ആവശ്യപ്പെട്ടു.
ആരോഗ്യവകുപ്പിനോ മന്ത്രിക്കോ മെഡിക്കല്‍കോളജിന്റെ കാര്യത്തില്‍ താല്‍പ്പര്യമില്ല. മുഖ്യമന്ത്രി ഉദ്ഘാടനം ചെയ്ത് പൊതുജനങ്ങള്‍ക്കായി തുറന്നുകൊടുത്ത ആശുപത്രിയുടെ പ്രവര്‍ത്തനം പോലും ഘട്ടംഘട്ടമായി നിര്‍ത്തിവയ്ക്കുന്നതിനാണ് ബന്ധപ്പെട്ടവര്‍ ശ്രമിക്കുന്നതെന്ന് അദ്ദേഹം പറഞ്ഞു.
അഞ്ഞൂറ് കിടക്കകളുള്ള ആശുപത്രിയില്‍ ഇ.എസ്.ഐവിഭാഗത്തില്‍പ്പെടാത്ത ഒരാളിനെപ്പോലും കിടത്തിചികിത്സിക്കാന്‍ തയാറാകാതെ ആശുപത്രിയുടെ പ്രവര്‍ത്തനവും നിര്‍ത്തിവയ്ക്കുന്ന ജനദ്രോഹ നടപടിയാണ് സ്വീകരിച്ചുവരുന്നത്. തിരുവനന്തപുരം ഇന്ദിരാഗാന്ധിമെഡിക്കല്‍ കോളജ് ഉപേക്ഷിച്ചപ്പോള്‍ അവിടെയുണ്ടായിരുന്ന ഡോക്ടര്‍മാരെ കൂട്ടത്തോടെ പാരിപ്പള്ളിയിലേക്ക് നിയമിച്ചെങ്കിലും ഭൂരിപക്ഷം പേരും പാരിപ്പള്ളി ആശുപത്രിയില്‍ സേവനം നടത്തുവാന്‍ താല്‍പര്യം കാണിക്കുന്നില്ല.
ആശുപത്രിയില്‍ ചികിത്സയ്‌ക്കെത്തുന്ന രോഗികളെ അസൗകര്യങ്ങള്‍ പറഞ്ഞ് മറ്റാശുപത്രികളിലേക്ക് റഫര്‍ചെയ്യുന്ന സംവിധാനമാണ് ഇപ്പോഴും തുടരുന്നതെന്ന് എം.പി പറഞ്ഞു.