മട്ടാഞ്ചേരി: ചുള്ളിക്കല്‍ മദര്‍ തേരേസ ജംഗ്ഷനില്‍ യുവാവ് കൊല്ലപ്പെട്ട സംഭവത്തില്‍ പൊലീസ് അന്വേഷണം കൂടുതല്‍ ശക്തമാക്കി. കൊല്ലപ്പെട്ട മില്‍ട്ടന്റെ  സഹോദരന്‍ ബാബുവിനെ കേന്ദ്രീകരിച്ചാണ് പൊലീസ് അന്വേഷണം പുരോഗമിക്കുന്നത്.
സംഭവത്തിന് ശേഷം ഇയാളെ കാണാതായതാണ് അന്വേഷണം ഈ വഴിക്ക് തിരിയാന്‍ കാരണമായത്.
ഇയാളുടെ ഫോണ്‍ സ്വിച്ച് ഓഫ് ചെയ്യപ്പെട്ട നിലയിലാണെന്ന് പൊലീസ് പറഞ്ഞു. കൊല്ലപ്പെട്ട മില്‍ട്ടന് നാല് സഹോദരന്‍മാരാണുള്ളത്. ഇതില്‍ മൂന്ന് പേരെയും പൊലീസ് വിശദമായി ചോദ്യം ചെയ്ത് കഴിഞ്ഞു. മില്‍ട്ടനോടൊപ്പം സ്ഥിരമായി മദ്യപിച്ചിരുന്ന സുഹൃത്തുക്കളേയും പൊലീസ് ചോദ്യം ചെയ്‌തെങ്കിലും കൂടുതലായൊന്നും ലഭിച്ചിട്ടില്ല.
ബാബുവിനെ കണ്ടെത്താന്‍ സൈബര്‍ സെല്ലിന്റെ സഹായവും അന്വേഷണ ഉദ്യോഗസ്ഥര്‍ തേടിയതായി അറിയുന്നു.കഴിഞ്ഞ ബുധനാഴ്ചയാണ് വാരിക്കകത്ത് വീട്ടില്‍ ജോസഫിന്റെ മകന്‍ മില്‍ട്ടനെ അമ്മയും സഹോദരനും താമസിക്കുന്ന വീടിനുള്ളില്‍ മരിച്ച നിലയില്‍ കണ്ടെത്തിയത്.