ലൊസേന്‍: റിയോ ഒളിംപിക്‌സ് ബോക്‌സിങ് മത്സരത്തിനിടെ വാതുവയ്പ്പ് നടത്തിയ ബോക്‌സിങ് താരങ്ങള്‍ക്ക് അന്താരാഷ്ട്ര ഒളിംപിക് കമ്മിറ്റിയുടെ ശാസന. മൂന്നു പേരാണ് നിയമലംഘനം നടത്തിയതെന്ന് ഐ.ഒ.സി വ്യക്തമാക്കി. ഇവരില്‍ രണ്ടു പേര്‍ അയര്‍ലന്‍ഡ് സ്വദേശികളാണ്. മൈക്കല്‍ കോണ്‍ലന്‍, സ്റ്റീവന്‍ ഡോണെല്ലി, ബ്രിട്ടന്റരെ ആന്റണി ഫോളര്‍ എന്നിവരെയാണ് ശാസിച്ചത്.
ഡോണെല്ലി രണ്ടു തവണ വാതുവച്ചെന്നും ഇതില്‍ ഒരു തവണ ജയിച്ചെന്നും എന്നാല്‍ പണം ലഭിച്ചില്ലെന്നും വ്യക്തമാക്കിയിട്ടുണ്ട്. ഒളിംപിക്‌സില്‍ മത്സരിക്കുന്ന താരങ്ങള്‍ നിയമവിരുദ്ധമായ പ്രവൃത്തികളില്‍ ഏര്‍പ്പെടരുതെന്ന് കര്‍ശനമായി നിര്‍ദേശം ഐ.ഒ.സി നല്‍കിയിരുന്നു. എന്നാല്‍ ഇവര്‍ മത്സരങ്ങള്‍ക്ക് മനഃപ്പൂര്‍വം കളങ്കമേല്‍പ്പിക്കാന്‍ ശ്രമിച്ചിരുന്നില്ല എന്ന് കണ്ടെത്തിയതിനാല്‍ ശിക്ഷ ശാസനയില്‍ ഒതുക്കുകയായിരുന്നു.