മലപ്പുറം: സഹോദയ സ്‌കൂള്‍ കോംപ്ലക്‌സ് മലപ്പുറം റീജിയന്റെ ആഭിമുഖ്യത്തില്‍ സംഘടിപ്പിക്കുന്ന പത്താമത് സി.ബി.എസ്.ഇ ജില്ലാ കലോത്സവം 22,23 തിയതികളിലായി പുഴക്കാട്ടിരി പി.ഇ.എസ് ഗ്ലോബല്‍ സ്‌കൂളില്‍ നടക്കും. സ്റ്റേജിതര മത്സരങ്ങള്‍ 19,20 തിയതികളില്‍ കോട്ടക്കല്‍ ഇസ്‌ലാഹിയ പബ്ലിക് സ്‌കൂളിലാണ് നടക്കുക. ജില്ലയിലെ അന്‍പതിലധികം സ്‌കൂളുകളില്‍ നിന്നുള്ള 3000 ത്തോളം വിദ്യാര്‍ഥികളാണ് മേളയില്‍ പങ്കെടുക്കുന്നത്. മത്സരത്തില്‍ വിജയികളാവുന്നവര്‍ നവംബര്‍ രണ്ടാം വാരം അടിമാലിയില്‍ നടക്കുന്ന സി.ബി.എസ്.ഇ സംസ്ഥാന കലോത്സവത്തില്‍ പങ്കെടുക്കും. സി.ബി.എസ്.ഇയുടെ പുതിയ മൂല്യനിര്‍ണയ സംവിധാന പ്രകാരം കലോത്സവത്തില്‍ വിജയികളാകുന്നവര്‍ക്ക് ഗ്രേഡിന് അര്‍ഹത ഉണ്ടായിരിക്കും. ജില്ലാ കലോത്സവത്തിനായി പെരിന്തല്‍മണ്ണ സില്‍വര്‍ മൗണ്ട് ഇന്റര്‍ നാഷണല്‍ സ്‌കൂളിലെ പത്താംക്ലാസ് വിദ്യാര്‍ഥിനി ഹിബ ഷൗക്കത്തലി തയാറാക്കിയ ലോഗോയുടെ പ്രകാശനം മലപ്പുറം പ്രസ്‌ക്ലബില്‍ നടന്ന ചടങ്ങില്‍ സഹോദയ സംസ്ഥാന പ്രസിഡന്റ് കെ. ഉണ്ണികൃഷ്ണന്‍ കലോത്സവ ജനറല്‍ കണ്‍വീനര്‍ വിനീത വി. നായര്‍ക്ക് നല്‍കി പ്രകാശനം ചെയ്തു. വാര്‍ത്താസമ്മേളനത്തില്‍ ഭാരവാഹികളായ എം. ജൗഹര്‍, ജിജി പോള്‍, പി. നിസാര്‍ ഖാന്‍, സൈതലവിക്കോയ പങ്കെടുത്തു.