റിയാദ്: തീവ്രവാദ ബന്ധത്തിന്റെ പേരില്‍ സഊദിയില്‍ അഞ്ചു പേര്‍ കഴിഞ്ഞ ദിവസങ്ങളില്‍ പിടിയിലായതായി സഊദി ആഭ്യന്തര മന്ത്രാലയം വ്യക്തമാക്കി. ഒരു സ്വദേശി പൗരനും ഇന്ത്യന്‍ പൗരനുമടക്കം അഞ്ചുപേരാണ് പിടിയിലായത്. ഇതോടെ തീവ്രവാദ കേസില്‍ സഊദിയില്‍ പിടിക്കപ്പെട്ട ഇന്ത്യക്കാരുടെ എണ്ണം 19 ആയതായി സഊദി പ്രാദേശിക പത്രങ്ങള്‍ റിപ്പോര്‍ട്ട് ചെയ്തു.

ഒരു സ്വദേശി, ഓരോ ഇന്ത്യന്‍, പാകിസ്താന്‍ പൗരന്മാര്‍, രണ്ടു സിറിയന്‍ പൗരന്‍ എന്നീ അഞ്ചു പേരെയാണ് കഴിഞ്ഞ ദിവസങ്ങളില്‍ രാജ്യത്തിന്റെ വിവിധ ഭാഗങ്ങളില്‍ നിന്നും തീവ്രവാദ കേസില്‍ പിടികൂടിയത്. ഇപ്പോള്‍ പിടികൂടിയ ഇവരെ കൂടുതല്‍ തെളിവുകള്‍ക്കായി ചോദ്യം ചെയ്യുന്നതിന് ബന്ധപ്പെട്ട വകുപ്പുകള്‍ക്ക് കൈമാറിയിരിക്കുകയാണ്.

നേരത്തെ പിടികൂടിയ 19 ഇന്ത്യക്കാരില്‍ ആദ്യ ഘട്ടത്തില്‍ പിടികൂടിയവര്‍ക്ക് തീവ്രവാദ കേസില്‍ കുറ്റപത്രം സമര്‍പ്പിച്ചിട്ടുണ്ട്. ബാക്കിയുള്ളവര്‍ ഇപ്പോഴും വിചാരണ നേരിടുകയാണ്. എന്നാല്‍ 2003 മുതല്‍ 51 പാകിസ്താന്‍ പൗരന്മാരെ തീവ്രവാദ കേസില്‍ പിടികൂടിയതായും ഇതില്‍ ഭൂരിഭാഗവും ജയില്‍ ശിക്ഷ അനുഭവിച്ചു വരികയാണെന്നും ആഭ്യന്തര മന്ത്രാലയത്തെ ഉദ്ധരിച്ച് പത്രങ്ങള്‍ റിപ്പോര്‍ട്ട് ചെയ്യുന്നു. ഇതുവരെയായി 5,277 പേരെ സഊദിയില്‍ തീവ്രവാദ കേസില്‍ പിടികൂടിയിട്ടുണ്ട്.