തിരൂരങ്ങാടി: മമ്പുറം ഖുഥ്ബുസമാന്‍ സയ്യിദ് അലവി മൗലദ്ദവീല (ഖ.സി) തങ്ങളുടെ 178ാമത് ആണ്ടു നേര്‍ച്ചക്ക് ഇന്ന് തുടക്കമാകും. ഒന്‍പതിന് സമാപിക്കും. ഇന്ന് വൈകീട്ട് അസര്‍ നിസ്‌കാരാനന്തരം ദാറുല്‍ഹുദാ ചാന്‍സലര്‍ പാണക്കാട് സയ്യിദ് ഹൈദരലി ശിഹാബ് തങ്ങളുടെ നേതൃത്വത്തില്‍ നടക്കുന്ന കൂട്ട സിയാറത്തിനു ശേഷം സയ്യിദ് അഹ്്മദ് ജിഫ്‌രി തങ്ങള്‍ മമ്പുറം പതാക ഉയര്‍ത്തുന്നതോടെയാണ് ഒരാഴ്ച നീണ്ടുനില്‍ക്കുന്ന നേര്‍ച്ചയ്ക്ക് തുടക്കമാകുക. വൈകീട്ട് മഗ്‌രിബ് നിസ്‌കാരാനന്തരം മജ്‌ലിസുന്നൂര്‍ ആത്മീയ സദസ് നടക്കും. പാണക്കാട് സയ്യിദ് സ്വാദിഖലി ശിഹാബ് തങ്ങള്‍ ഉദ്ഘാടനം ചെയ്യും. 3, 4, 5, 7 തിയതികളില്‍ രാത്രി എഴിന് മതപ്രഭാഷണങ്ങള്‍ നടക്കും. ഒക്‌ടോബര്‍ ആറിന് മഗ്‌രിബ് നിസ്‌കാരാനന്തരം നടക്കുന്ന സ്വാലാത്ത് മജ്‌ലിസിനു കോഴിക്കോട് ഖാസി സയ്യിദ് മുഹമ്മദ് കോയ തങ്ങള്‍ ജമലുല്ലൈലി നേതൃത്വം നല്‍കും.
എട്ടിന് ദുആ സമ്മേളനം സയ്യിദ് മുനവ്വറലി ശിഹാബ് തങ്ങള്‍ ഉദ്ഘാടനം ചെയ്യും. ഒന്‍പതിന് നടക്കുന്ന അന്നദാനം, ഖത്മ് ദുആ മജ്‌ലിസ് പരിപാടികളോടെ നേര്‍ച്ചക്ക് കൊടിയിറങ്ങും.