അമൃത്‌സര്‍: വാഗാ അതിര്‍ത്തിയിലെ പതാക ഉയര്‍ത്തല്‍ ചടങ്ങിനിടെ പാക് സന്ദര്‍ശകര്‍ ഇന്ത്യന്‍ കാഴ്ചക്കാരുടെ ഗാലറിയിലേക്ക് കല്ലെറിഞ്ഞു. ഇന്നലെ അട്ടാരി അന്താരാഷ്ട്ര അതിര്‍ത്തിയില്‍ പതാക ഉയര്‍ത്തുന്നതിനിടെയായിരുന്നു അസാധാരണ സംഭവം.
ചടങ്ങ് കാണാനെത്തിയ പാക്കിസ്താനില്‍ നിന്നുള്ള സന്ദര്‍ശകര്‍ കശ്മിര്‍ അനുകൂല മുദ്രാവാക്യം ഉയര്‍ത്തി ഇന്ത്യന്‍ ഗാലറിയിലേക്കു കല്ലെറിയുകയായിരുന്നു. സംഭവം ബി.എസ്.എഫ് ഉദ്യോഗസ്ഥര്‍ സ്ഥിരീകരിച്ചു. കഴിഞ്ഞ ദിവസങ്ങളില്‍ പാക് സന്ദര്‍ശകര്‍ തുടര്‍ച്ചയായി ഇന്ത്യാവിരുദ്ധ മുദ്രാവാക്യങ്ങള്‍ മുഴക്കുന്നതായും സൈനിക വൃത്തങ്ങള്‍ പറഞ്ഞു.
നേരത്തെ, ഉറി ആക്രമണത്തിനു തിരിച്ചടിയായി പാക്കധീന കശ്മിരില്‍ ഇന്ത്യ നടത്തിയ മിന്നലാക്രമണത്തെ തുടര്‍ന്ന് അതിര്‍ത്തിയിലെ പതാക ഉയര്‍ത്തല്‍ പരിപാടി രണ്ടു ദിവസം നിര്‍ത്തിവച്ചിരുന്നു.