കൊടുവള്ളി: ഇതരസംസ്ഥാന തൊഴിലാളികള്‍ താമസിക്കുന്ന സ്ഥലങ്ങള്‍ ലഹരിമുക്തമാക്കുന്നതിന്റെ ഭാഗമായി പൊലിസും എക്‌സൈസും സംയുക്തമായി നടത്തുന്ന ഓപറേഷന്‍ ഭായ് പരിശോധനക്കിടെ കൊടുവള്ളിയില്‍ അനധികൃതമായി സൂക്ഷിച്ച പുകയില ഉല്‍പന്നങ്ങള്‍ പിടികൂടി. തലപ്പെരുമണ്ണ, എരഞ്ഞിക്കോത്ത് എന്നിവിടങ്ങളിലെ ഇതരസംസ്ഥാന തൊഴിലാളികള്‍ താമസിക്കുന്ന കെട്ടിടങ്ങളില്‍ നിന്ന് 77 പാക്കറ്റോളം പുകയില ഉല്‍പന്നങ്ങളാണ് പിടികൂടിയത്. കച്ചേരിമുക്ക്, മുക്കിലങ്ങാടി എന്നിവിടങ്ങളിലും പരിശോധന നടത്തി. കൊടുവള്ളി എസ്.ഐ പി. പ്രജീഷ് എക്‌സൈസ് ഉദ്യോഗസ്ഥരായ ഗിരീഷ്, വസന്തന്‍, രാജന്‍, ജിനീഷ് എന്നിവരുടെ നേതൃത്വത്തിലാണ് പരിശോധന നടത്തിയത്. വരും ദിവസങ്ങളിലും പരിശോധന നടക്കുമെന്ന് ഉദ്യോഗസ്ഥര്‍ അറിയിച്ചു.