തളിപ്പറമ്പ്: പരിയാരം മെഡിക്കല്‍ കോളജിന് മുന്നില്‍ യൂത്ത് കോണ്‍ഗ്രസ് സംഘടിപ്പിച്ച പ്രതിഷേധ കൂട്ടായ്മയിടെ സംഘര്‍ഷാവസ്ഥ. എല്‍.ഡി.എഫ് സര്‍ക്കാറിന്റെ സ്വാശ്രയ നയത്തില്‍ അഴിമതി ആരോപിച്ചും പരിയാരം മെഡിക്കല്‍ കോളജിലെ ഫീസ് ഗവ.കോളജിന് തുല്ല്യമാക്കണമെന്നാവശ്യപ്പെട്ടുമാണ് യൂത്ത് കോണ്‍ഗ്രസ് കോളജിനു മുന്നില്‍ പ്രതിഷേധ കൂട്ടായ്മയൊരുക്കിയത്. കൂട്ടായ്മയ്ക്കു ശേഷം മെഡിക്കല്‍ കോളജിലേക്ക് ഇരച്ചു കയറാന്‍ ശ്രമിച്ച പ്രവര്‍ത്തകരെ പൊലിസ് തടഞ്ഞതാണ് അല്‍പനേരം സംഘര്‍ഷത്തിനിടയാക്കിയത്. അതിനിടെ ഒരു വിഭാഗം പ്രവര്‍ത്തകര്‍ അക്രമാസക്തരായി ദേശീയപാത ഉപരോധിച്ചു. കെ.എസ്.ആര്‍.ടി.സി ബസുകള്‍ തടയുകയും കോളജ് കവാടത്തിനു നേരെ കല്ലെറിയുകയും ചെയ്തു. നേതാക്കളിടപെട്ട് പ്രവര്‍ത്തകരെ പെട്ടെന്ന് തന്നെ അനുനയിപ്പിക്കുകയും പൊലിസ് സംയമനം പാലിക്കുകയും ചെയ്തതിനാല്‍ കൂടുതല്‍ സംഘര്‍ഷം ഒഴിവായി. പയ്യന്നൂര്‍ സി.ഐ ആസാദ്, ശ്രീകണ്ഠാപുരം സി.ഐ സുരേശന്‍ എന്നിവരുടെ നേതൃത്വത്തില്‍ നൂറോളം പോലിസുകാരെയും സ്ഥലത്ത് വിന്യസിച്ചിരുന്നു.
എല്‍.ഡി.എഫ് സര്‍ക്കാര്‍ സ്വാശ്രയ മാനേജ്‌മെന്റുകളുടെ കുഴലൂത്തുകാരായി മാറിയിരിക്കയാണെന്ന് പ്രതിഷേധ കൂട്ടായ്മ ഉദ്ഘാടനം ചെയ്ത കെ.പി.സി.സി ജനറല്‍ സെക്രട്ടറി സതീശന്‍ പാച്ചേനി ആക്ഷേപിച്ചു. പ്രതിപക്ഷത്തായിരുന്നപ്പോള്‍ സ്വാശ്രയ വിഷയത്തില്‍ സമരമുഖത്ത് നിറഞ്ഞുനിന്നിരുന്ന ഡി.വൈ.എഫ്.ഐ സ്വന്തം പാര്‍ട്ടി ഭരിക്കുമ്പോള്‍ മൗനം പാലിക്കേണ്ട ഗതികേടിലാണെന്ന് പ്രതിഷേധ കൂട്ടായ്മയില്‍ സംസാരിച്ച നേതാക്കള്‍ പറഞ്ഞു. ഡി.വൈ.എഫ്.ഐ നേതാക്കള്‍ തങ്ങളുടെ മൗനം കൊണ്ട് യൂത്ത് കോണ്‍ഗ്രസ് സമരത്തെ അനുകൂലിക്കുകയാണെന്നും നേതാക്കള്‍ പറഞ്ഞു.
യൂത്ത് കോണ്‍ഗ്രസ് കാസര്‍കോട് ലോകസഭാ മണ്ഡലം പ്രസിഡന്റ് സാജിദ് മൗവ്വല്‍ അധ്യക്ഷനായി. റിജില്‍ മാക്കുറ്റി, അഡ്വ.സജീവ് ജോസഫ്, വി.എന്‍ എരിപുരം, കല്ലിങ്കീല്‍ പത്മനാഭന്‍, അമൃതാ രാമകൃഷ്ണന്‍, ജോഷി കണ്ടത്തില്‍, നൗഷാദ് ബ്ലാത്തൂര്‍, ഹക്കിം കുന്നില്‍, സുരേഷ്ബാബു എളയാവൂര്‍ സംസാരിച്ചു. ഇന്ന് രാവിലെ പ്രതിപക്ഷ വിദ്യാര്‍ഥി സംഘടനകള്‍ മെഡിക്കല്‍ കോളജിലേക്ക് പ്രതിഷേധ മാര്‍ച്ച് നടത്തും. പൊലിസിനെ വെല്ലുവിളിച്ച് പ്രവര്‍ത്തകര്‍ സംഘര്‍ഷാന്തരീക്ഷം സൃഷ്ടിച്ചത് കണക്കിലെടുത്ത് ഇന്ന് കൂടുതല്‍ ശക്തമായ പൊലിസ് സുരക്ഷ ഒരുക്കാന്‍ ഉന്നതതല നിര്‍ദേശം ലഭിച്ചതായി അറിയുന്നു.