തിരുവനന്തപുരം: ഡേറ്റാ ചോര്‍ച്ചയുമായി ബന്ധപ്പെട്ട് മുഖ്യമന്ത്രി പിണറായി വിജയനെതിരെ ഗുരുതര ആരോപണവുമായി കോണ്‍ഗ്രസ് നേതാവ് രമേശ് ചെന്നിത്തല. മുഖ്യമന്ത്രിയുടെ ഓഫീസ് വഴി ഒരു കോടിയിലധികം സാധാരണക്കാരുടെ വ്യക്തിവിവരങ്ങള്‍ ചോര്‍ത്തിയിരിക്കുന്നു. മുഖ്യമന്ത്രി പിണറായി വിജയന്റെ അറിവോടെയാണ് ഈ ഗുരുതരമായ ഡാറ്റാ മോഷണം നടന്നിരിക്കുന്നത്. സ്ത്രീ സുരക്ഷാ പദ്ധതിയിലുള്ള ലക്ഷക്കണക്കിന് അമ്മമാരുടെയും സഹോദരിമാരുടെയും, കൂടാതെ സര്‍ക്കാര്‍ ജീവനക്കാരുടെയും പെന്‍ഷന്‍കാരുടെയും അതീവ രഹസ്യമായ വിവരങ്ങള്‍ തിരഞ്ഞെടുപ്പ് അട്ടിമറിക്കാന്‍ വേണ്ടി ഒരു സ്വകാര്യ ഏജന്‍സിക്ക് കൈമാറിയിരിക്കുകയാണെന്നും ചെന്നിത്തല ആരോപിച്ചു. മുഖ്യമന്ത്രി ഓഫീസ് വിവരങ്ങള്‍ ആവശ്യപ്പെട്ട് അയച്ച രണ്ട് കത്തുകളും ചെന്നിത്തല പുറത്തുവിട്ടു.

സ്ത്രീ സുരക്ഷാ പദ്ധതിയില്‍ ചേര്‍ത്തവരുടെ പേരുവിവരങ്ങളും സര്‍ക്കാര്‍ ചോര്‍ത്തി. ലക്ഷക്കണക്കിന് സാധാരണക്കാരായ സ്ത്രീകളുടെ വിവരങ്ങളാണ് ചോര്‍ത്തിയത്. ഇതിന് പിന്നിലും മുഖ്യമന്ത്രിയുടെ ഓഫിസ് തന്നെയാണ്. ഈ പദ്ധതിയില്‍ രജിസ്റ്റര്‍ ചെയ്ത കേരളത്തിലെ 35ന് മുകളില്‍ പ്രായമുള്ള ലക്ഷക്കണക്കിന് സ്ത്രീകളുടെ വ്യക്തിവിവരങ്ങളാണ് മുഖ്യമന്ത്രിയുടെ ഓഫിസര്‍ ഓണ്‍ സ്‌പെഷ്യല്‍ ഡ്യൂട്ടി നല്‍കിയ കത്ത് പ്രകാരം ചോര്‍ത്തിയെടുത്തതെന്ന് ചെന്നിത്തല ആരോപിച്ചു. 

ഇതിനുതെളിവായി മുഖ്യമന്ത്രിയുടെ ഓഫീസര്‍ ഓണ്‍ സ്‌പെഷല്‍ ഡ്യുട്ടി സീറാം സാംബശിവറാവു ഫെബ്രുവരി ഏഴിന് അയച്ച കത്താണ് അദ്ദേഹം പുറത്തുവിട്ടത്. 

ALSO READ: ഡല്‍ഹി മദ്യനയക്കേസ്: കെജ്‌രിവാളും സിസോദിയയും കുറ്റവിമുക്തര്‍; സി.ബി.ഐയ്ക്ക് കോടതിയുടെ രൂക്ഷവിമര്‍ശനം

യാതൊരു മുന്‍കരുതലുമില്ലാതെ സ്വകാര്യ ഏജന്‍സികള്‍ക്കു ഈഡേറ്റ കൈമാറി തെരഞ്ഞെടുപ്പ് ആവശ്യത്തിന് ഉപയോഗിച്ചുവെന്നും അദ്ദേഹം ആരോപിച്ചു. ഈ ഡാറ്റ ലഭിച്ച സ്വകാര്യ ഏജന്‍സികള്‍ ഇവ ദുരുപയോഗം ചെയ്യാനിടയുണ്ടെന്നും അദ്ദേഹം പറഞ്ഞു.

എട്ട് ലക്ഷത്തോളം സംസ്ഥാന സര്‍ക്കാര്‍ ജീവനക്കാര്‍, 72 ലക്ഷം ക്ഷേമ പെന്‍ഷന്‍കാര്‍, മൂന്ന് ലക്ഷം ചെറുകിട സംരംഭകര്‍, സ്ത്രിസുരക്ഷാ പദ്ധതിയില്‍ പേരു ചേര്‍ത്തവര്‍ തുടങ്ങി ഒരുകോടിയില്‍പരം വ്യക്തികളുടെ ഫോണ്‍ നമ്പര്‍, പേര്, പ്രായം, ലിംഗം, ജില്ല, താലൂക്ക്, വാര്‍ഡ്, തദ്ദേശസ്ഥാപനം എന്നിങ്ങനെയുള്ള കോടിക്കണക്കിന് രൂപയുടെ വാണിജ്യമൂല്യമുള്ള ഗവണ്‍മെന്റ് വെരിഫൈഡ് വ്യക്തിഗത വിവരങ്ങള്‍ സ്വകാര്യ കമ്പനികള്‍ക്കു കൈമാറാന്‍ നേതൃത്വം നല്‍കിയ മുഖ്യമന്ത്രി പിണറായി വിജയന്‍ ചെയ്തത് ക്രിമിനല്‍ കുറ്റമാണ്. ഗുരുതരമായ ക്രിമിനല്‍ കുറ്റം ചെയ്ത മുഖ്യമന്ത്രി രാജി വെച്ച് ഒഴിയണം. ഈ വിഷയത്തില്‍ സമഗ്രാന്വേഷണം നടത്തണമെന്നും രമേശ് ചെന്നിത്തല വാര്‍ത്താ സമ്മേളനത്തില്‍ പറഞ്ഞു.

 ഡാറ്റകള്‍ പുറത്തുപോയാല്‍ സൈബര്‍ തട്ടിപ്പടക്കമുള്ള വന്‍ കുറ്റകൃത്യങ്ങള്‍ക്ക് വഴിവെക്കുമെന്നും സൈബര്‍ തട്ടിപ്പ് സംഘങ്ങളുടെ കയ്യില്‍ ഈ പാവപ്പെട്ട സ്ത്രീകളുടെ വ്യക്തിവിവരങ്ങള്‍ എത്തിയാല്‍ ഗുരുതരമായ പ്രത്യഘാതമാണുണ്ടാവുകയെന്നും അദ്ദേഹം കൂട്ടിച്ചേര്‍ത്തു. 

Senior Congress leader Ramesh Chennithala has alleged that personal information of more than one crore people has been leaked, terming the incident a major case of data theft. He claimed that sensitive details were compromised and presented additional documents to substantiate his allegations.