കാസര്‍കോട്: ശമ്പളം മുടങ്ങിയതില്‍ പ്രതിഷേധിച്ചു കെ.എസ്.ആര്‍.ടി.സി കാസര്‍കോട്, കാഞ്ഞങ്ങാട് ഡിപ്പോകളിലെ ജീവനക്കാര്‍ സമരത്തില്‍. ഇന്നലെ രാവിലെ മുതലാണു കാസര്‍കോട് ഡിപ്പോയിലെ ജീവനക്കാര്‍ പണിമുടക്കിയത്. ഇതോടെ മംഗളൂരു ഉള്‍പ്പെടെയുള്ള പ്രധാന റൂട്ടുകളിലേക്കുള്ള സര്‍വിസുകള്‍ താളം തെറ്റി. കാസര്‍കോട് ഡിപ്പോയില്‍ നിന്നു മാത്രം പകുതിയോളം സര്‍വിസുകള്‍ നിലച്ചു. ഈ മാസം അഞ്ചാം തിയതി പിന്നിട്ടിട്ടും ശമ്പളം ലഭിച്ചില്ലെന്നാണു ജീവനക്കാരുടെ പരാതി. കാസര്‍കോട് ഡിപ്പോയില്‍ ജീവനക്കാര്‍ പ്രതീകാത്മകമായി കഞ്ഞിവെപ്പു സമരവും നടത്തി.
സി.ഐ.ടി.യു, ഐ.എന്‍.ടി.യു.സി, ബി.എം.എസ് തുടങ്ങിയ സംഘടനകളില്‍പ്പെട്ട ജീവനക്കാരാണ് പണിമുടക്കിലേര്‍പ്പെട്ടിരിക്കുന്നത്. എത്രയും വേഗം ശമ്പളം നല്‍കിയില്ലെങ്കില്‍ അനിശ്ചിതകാല സമരപരിപാടികളിലേര്‍പ്പെടുമെന്ന് ട്രേഡ് യൂനിയനുകള്‍ ഡിപ്പോ അധികൃതര്‍ക്കു മുന്നറിയിപ്പ് നല്‍കി. കാസര്‍കോട് ഡിപ്പോയില്‍ സര്‍വിസുകള്‍ താളം തെറ്റിയതോടെ കെ.എസ്.ആര്‍.ടി.സി മാത്രം ഓടുന്ന റൂട്ടുകളിലെ യാത്രക്കാര്‍ ദുരിതത്തിലായി.
കാഞ്ഞങ്ങാട് ഡിപ്പോയില്‍ കഴിഞ്ഞ ദിവസം നടന്ന പ്രതിഷേധ സമരത്തിനു പിന്നാലെ അന്‍പതോളം ജീവനക്കാര്‍ നിരാഹാര സമരവും തുടങ്ങിയിരുന്നു. ഇത് ഇന്നലെയും തുടര്‍ന്നു. അതേ സമയം ഇന്നലെ രാവിലെ മുതല്‍ ഇവിടെ ജീവനക്കാര്‍ പണിമുടക്കു സമരവും ആരംഭിച്ചു. ഇതോടെ ഡിപ്പോയില്‍ നിന്നുള്ള സര്‍വിസുകളെ ബാധിക്കുകയും ചെയ്തു. ശമ്പളം കിട്ടാതെ സമരത്തില്‍ നിന്നു പിന്മാറിലെന്ന ഉറച്ച തീരുമാനമാണ് ഒരു കൂട്ടം ജീവനക്കാര്‍ എടുത്തിട്ടുള്ളത്.
പണിമുടക്കിനെ തുടര്‍ന്ന് ബസുകളുടെ സര്‍വിസുകള്‍ അലങ്കോലപ്പെട്ടു. സി.ഐ.ടി.യു സംഘടനയില്‍പ്പെട്ട തൊഴിലാളികളും ഇന്നലെ കാഞ്ഞങ്ങാട് ഡിപ്പോയില്‍ സമരത്തിനിറങ്ങിയിരുന്നു.