തിരൂര്‍: കേന്ദ്ര സാങ്കേതിക വകുപ്പും പൊതുമേഖലാ സ്ഥാപനമായ കിറ്റ്‌കോയയും ചേര്‍ന്ന് അഹമ്മദാബാദിലുള്ള എന്റര്‍പ്രണര്‍ഷിപ്പ് ഡെവലപ്പ്‌മെന്റ് ഇന്‍സിസ്റ്റ്യൂട്ട് ഓഫ് ഇന്ത്യയുടെ സഹകരണത്തോടെ ഒക്ടോബറില്‍ തിരൂരില്‍ ഒരു മാസം നീളുന്ന സൗജന്യ വ്യവസായ സംരംഭകത്വ വികസന പരിശീലന പരിപാടി സംഘടിപ്പിക്കുന്നു.
സ്വന്തമായി സംരംഭം തുടങ്ങാന്‍ ആഗ്രഹിക്കുന്ന സയന്‍സ് വിഷയത്തില്‍ ബിരുദമോ ഏതെങ്കിലും ഡിപ്ലോമയോ ഉള്ളവര്‍ക്ക് അപേക്ഷിക്കാം. പ്രായപരിധി 18നും 40നും മധ്യേ. ലാഭകരമായ സംരംഭങ്ങള്‍ തെരഞ്ഞെടുക്കേണ്ട വിധം, സാമ്പത്തിക വായ്പാ മാര്‍ഗങ്ങള്‍, മാര്‍ക്കറ്റിങ് മാനേജ്‌മെന്റ്, ബിസിനസ് പ്ലാനിങ്, പ്രോജക്ട് റിപ്പോര്‍ട്ട്, മാനേജ്‌മെന്റ്, വിജയം കൈവരിച്ച സംരംഭകരുടെ അനുഭവങ്ങള്‍,  പേഴ്‌സണാലിറ്റി ഡെലവപ്പ്‌മെന്റ്,  ആശയവിനിമയ പാടവം, മോട്ടിവേഷന്‍ തുടങ്ങിയ നിരവധി വിഷയങ്ങള്‍ പരിശീലന പരിപാടിയിലുണ്ട്.
പങ്കെടുക്കാന്‍ താല്‍പര്യപ്പെടുന്നവര്‍ തിരൂര്‍ തൃക്കണ്ടിയൂരിലെ എല്‍.ഐ.സി ഓഫിസിന് സമീപമുള്ള കെ.ജി ബോസ് ഹാളില്‍ ഒക്ടോബര്‍ എട്ടിനു രാവിലെ 10.30നു രജിസ്‌ട്രേഷനും അഭിമുഖത്തിനും എത്തണമെന്നു പ്രിന്‍സിപ്പല്‍ കണ്‍സല്‍ട്ടന്റ് ജില്‍സ്.കെ. ജോസ് അറിയിച്ചു.