കോതമംഗലം: നേര്യമംഗലം പ്രാഥമികാരോഗ്യ കേന്ദ്രത്തില്‍ കിടത്തി ചികിത്സ ആരംഭിക്കുന്നതിന് അടിയന്തിര നടപടി സ്വികരിക്കുമെന്ന് ആരോഗ്യ മന്ത്രി ഉറപ്പ് നല്‍കിയതായി ആന്റണി ജോണ്‍ . ബ്ലോക്ക് പഞ്ചായത്തിന് കീഴിലെ നേര്യമംഗലം പ്രാഥമികാരോഗ്യ കേന്ദ്രത്തില്‍ ദിനേനെ മുന്നൂറിലധികം രോഗികളാണ് ചികിത്സ തേടിയെത്തുന്നത്. വിദഗ്ധ ചികിത്സക്കും കിടത്തി ചികത്സയ്ക്കും കോതമംഗലത്തെ ആശുപത്രികളെ ആശ്രയിക്കേണ്ട സാഹചര്യമാണുള്ളത്.
ഇടുക്കി ജില്ലയുമായി അതിര്‍ത്തി പങ്കിടുന്ന സ്ഥലം എന്ന നിലക്ക് ഇവിടെ നിന്നും മാമലക്കണ്ടം അടക്കമുള്ള ആദിവാസി മേഖലകളില്‍ നിന്നുള്ളവരുടെയും ആദ്യ ആശ്രയ കേന്ദ്രമാണിവിടം. കിടത്തി ചികിത്സയ്ക്ക് വേണ്ട അടിസ്ഥാന സൗകര്യങ്ങള്‍ ഇവിടെ ഉണ്ട്. എം.എല്‍.എ, ബ്ലോക്ക് പഞ്ചായത്ത് പ്രസിഡന്റ് റഷിദ സലീം, ബ്ലോക്ക് പഞ്ചായത്തംഗം എം.എന്‍.ശശി എന്നിവരുടെ നേതൃത്വത്തില്‍ ആരാേഗ്യ മന്ത്രിയുമായി നടത്തിയ ചര്‍ച്ചയിലാണ് കിടത്തി ചികിത്സ ആരംഭിക്കുന്നതിന് അടിയന്തിര നടപടി സ്വീകരിക്കുമെന്ന ഉറപ്പ് മന്ത്രി നല്‍കിയത്.