മാനന്തവാടി: അപകടഭീഷണിയുടെ പേരില്‍ മാനന്തവാടി ഡിവിഷനല്‍ ഫോറസ്റ്റ് ഓഫിസ് സ്ഥിതി ചെയ്യുന്ന പൈതൃക വനത്തിനുള്ളിലെ വന്‍മരങ്ങള്‍ മുറിച്ചുനീക്കുന്നു. മാനന്തവാടി നഗരത്തിലെയും പരിസരപ്രദേശങ്ങളിലെയും ഭൂപ്രകൃതിയെ നിലനിര്‍ത്തുന്നതില്‍ പ്രധാനപങ്കുവഹിക്കുന്ന സംരക്ഷിത പൈതൃക വനപ്രദേശമാണിത്. മരത്തിന്റെ ശിഖരങ്ങള്‍ വീണു അടുത്തിടെ ഡി.എഫ്.ഒ ഓഫിസ് പ്രവര്‍ത്തിക്കുന്ന ഒരു കെട്ടിടത്തിനു നാശനഷ്ടങ്ങള്‍ സംഭവിച്ചിരുന്നു. ഈ കാരണം ചൂണ്ടിക്കാട്ടിയാണ് പ്രകൃതി ചൂഷണം നടക്കുന്നത്.
30 മുതല്‍ 50 വര്‍ഷം വരെ പ്രായമേറിയ മരങ്ങളാണ് മുറിച്ചുമാറ്റിയവയില്‍ കൂടുതലും. കെട്ടിടങ്ങളോടു ചേര്‍ന്നുനില്‍ക്കുന്ന ഇത്തരം വൃക്ഷങ്ങളുടെ ശിഖിരങ്ങള്‍ മുറിച്ചുമാറ്റിയാല്‍ തന്നെ അപകടങ്ങള്‍ ഒഴിവാക്കാമെന്നിരിക്കെ വേരോടെ മുറിച്ചുമാറ്റുന്നതില്‍ വന്‍ അഴിമതിയുണ്ടെന്ന് പരിസ്ഥിതി പ്രവര്‍ത്തകനായ അഡ്വ. ശ്രീജിത്ത് പെരുമന ആരോപിച്ചു. കെട്ടിടങ്ങളോടു ചേര്‍ന്നുള്ള മരങ്ങള്‍ മുറിക്കാനാണ് ഉത്തരവിട്ടതെങ്കിലും സംരക്ഷിത വനമേഖലയിലുള്‍പ്പെടെ മരങ്ങള്‍ മുറിച്ചുമാറ്റുന്നതായാണ് സൂചന. 14 വന്‍മരങ്ങളാണ് മുറിച്ചുമാറ്റിയതെന്ന് ഫോറസ്റ്റ് അധികൃതര്‍ പറയുമ്പോഴും യഥാര്‍ഥ കണക്കുകള്‍ അതില്‍ കൂടുതലാണ്. മരങ്ങളില്‍ പലതിന്റെയും ശിഖിരങ്ങളെല്ലാം മുറിച്ചുമാറ്റി കയറുകള്‍ ഉപയോഗിച്ച് ചുവട് അറുത്തുമാറ്റാന്‍ പാകത്തില്‍ നില്‍ക്കുകയാണ്.
 ദേശാടന പക്ഷികളുള്‍പ്പെടെ അപൂര്‍വയിനം പക്ഷി മൃഗാധികള്‍ അതിവസിക്കുന്ന മരങ്ങളാണ് മുറിച്ചുമാറ്റപ്പെട്ടത്. ഇടനിലക്കാരുടെ സഹായത്തോടെയാണ് മരം മുറി നടക്കുന്നതെന്നാണ് ഫോറസ്റ്റ് ഉദ്യോഗസ്ഥര്‍ തന്നെ അനൗദ്യോഗികമായി പറയുന്നത്.
കെട്ടിടങ്ങള്‍ക്കു അപകമുടമുണ്ടാക്കുന്നുവെന്ന വ്യാജേന പൈതൃക വനഭൂമിയില്‍ നടക്കുന്ന മരംമുറി അടിയന്തരമായി നിര്‍ത്തിവയ്ക്കണമെന്നും സംഭവത്തില്‍ വിശദമായ അന്വേഷണം നടത്തണമെന്നും അല്ലാത്തപക്ഷം പ്രകൃതിക്കു വന്‍നാശമുണ്ടാകുമെന്നും ചൂണ്ടിക്കാണിച്ച് കണ്ണൂര്‍ എ.സി.എഫിനും സംസ്ഥാന വനം വകുപ്പിനും അഡ്വ. ശ്രീജിത്ത് പെരുമന പരാതി നല്‍കി.