ന്യൂഡല്‍ഹി: പൂഞ്ചില്‍ ഇന്ത്യന്‍ സൈനിക പോസ്റ്റുകള്‍ക്കുനേരെ പാകിസ്താന്‍ നടത്തിയ വെടിവയ്പ്പില്‍ ബി.എസ്.എഫ് ജവാനു പരുക്കേറ്റു. പൂഞ്ചിലെ മെന്താര്‍ മേഖലയിലാണു വെടിവയ്പ്പുണ്ടായത്.
വെള്ളിയാഴ്ച നിയന്ത്രണരേഖയില്‍ പാകിസ്താന്‍ സൈന്യം നടത്തിയ ഷെല്ലാക്രമണത്തിനു പിന്നാലെയാണ് ഇന്നലത്തെ വെടിവയ്പ്പ്. നിയന്ത്രണരേഖ കടന്ന് ഇന്ത്യ നടത്തിയ മിന്നലാക്രമണത്തിനുശേഷം ഇത് 25-ാം തവണയാണ് പാകിസ്താന്‍ സൈന്യം വെടിനിര്‍ത്തല്‍ കരാര്‍ലംഘിക്കുന്നത്. പാക്കധീന കശ്മിരിലെ നിയന്ത്രണരേഖയ്ക്കടുത്തുള്ള സിവിലിയന്മാരെ പാകിസ്താന്‍ സൈന്യം കൂടുതല്‍ ഉള്‍ഗ്രാമങ്ങളിലേക്കു മാറ്റിപ്പാര്‍പ്പിച്ചിട്ടുണ്ട്. മിന്നലാക്രമണത്തിന്റെ മാതൃകയില്‍ ഇനിയും ഇന്ത്യയില്‍ നിന്നു പ്രകോപനമുണ്ടായാല്‍ തിരിച്ചടിക്കാന്‍ ലക്ഷ്യമിട്ടാണ് പാക് സൈന്യം ഒരുക്കങ്ങള്‍ നടത്തുന്നതെന്നാണ് ഇന്ത്യന്‍ ഇന്റലിജന്‍സ് വൃത്തങ്ങള്‍ കരുതുന്നത്. ജമ്മു അതിര്‍ത്തിക്കപ്പുറത്തുള്ള പരിശീലന കേന്ദ്രങ്ങളില്‍ ഇന്ത്യന്‍ സൈന്യം ആക്രമണം നടത്താനുള്ള സാധ്യതയും പാകിസ്താന്‍ കാണുന്നുണ്ടെന്ന് ഇന്റലിജന്‍സ് വൃത്തങ്ങള്‍ വ്യക്തമാക്കുന്നു.