അടിമാലി: സംസ്ഥാന സി.ബി.എസ്.ഇ കലോത്സവം നവംബര്‍ 17 മുതല്‍ 20 വരെ അടിമാലി വിശ്വദീപ്തി സി.എം.ഐ പബ്ലിക് സ്‌കൂളില്‍ നടക്കുമെന്ന് കലോത്സവ കമ്മിറ്റി കണ്‍വീനര്‍ ഫാ. ടോമി നമ്പ്യാപറമ്പില്‍, ഭാരവാഹികളായ അഡ്വ. ടി.പി.എം ഇബ്രാംഹിംഖാന്‍, കെ ഉണ്ണികൃഷ്ണന്‍, ഡോ. ഇന്ദിര രാജന്‍, കെ.എ ഫ്രാന്‍സിസ് എന്നിവര്‍ അറിയിച്ചു. കേരള സ്‌റ്റേറ്റ് സി.ബി.എസ്.ഇ മാനേജ്‌മെന്റ് അസോസിയേഷന്‍, കോണ്‍ഫെഡറേഷന്‍ ഓഫ് കേരള സഹോദയ കോംപ്ലക്‌സ് എന്നീ സംഘടനകള്‍ സംയുക്തമായാണ് കലോത്സവത്തിന് നേതൃത്വം നല്‍കുന്നത്.
കേരളത്തിലെ 25 സഹോദയകളില്‍ നിന്നുള്ള 1300 സ്‌കൂളുകളിലെ എണ്ണായിരത്തോളം വിദ്യാര്‍ത്ഥികളാണ് മത്സരത്തില്‍ പങ്കെടുക്കുന്നത്. നാലുദിവസം നീളുന്ന പരിപാടികളില്‍ 22 വേദികളിലായി 144 ഇനങ്ങളിലാണ് മത്സരങ്ങള്‍ നടക്കുന്നത്.
മാനേജ്‌മെന്റ് അസോസിയേഷനും കോണ്‍ഫെഡറേഷനും രണ്ടായി നടത്തിവന്നിരുന്ന സംസ്ഥാന കലോത്സവം കഴിഞ്ഞ വര്‍ഷം മുതലാണ് കേരളത്തിലെ മുഴുവന്‍ അംഗീകൃത സി.ബി.എസ്.ഇ സ്‌കൂളുകളെയും പങ്കെടുപ്പിച്ചുകൊണ്ട് സംയുക്തമായി നടത്തുവാന്‍ തീരുമാനിച്ചത്. അടിമാലി വിശ്വദീപ്തി സ്‌കൂളില്‍ ചേര്‍ന്ന യോഗത്തില്‍ മാനവ വിഭവ വകുപ്പ് സ്‌റ്റേറ്റ് സ്‌കൂള്‍ ആന്‍ഡ് സാക്ഷരതാ വകുപ്പു മന്ത്രി ഉപേന്ദ്ര കുഷ് വഹ മുഖ്യരക്ഷാധികാരി, അഡ്വ. ജോയ്‌സ് ജോര്‍ജ് എം.പി, എം.എല്‍.എമാരായ എസ് രാജേന്ദ്രന്‍, പി.ജെ ജോസഫ്, റോഷി അഗസ്റ്റിന്‍, എം.എം മണി, ഇ.എസ് ബിജിമോള്‍ എന്നിവര്‍ സഹരക്ഷാധികാരികളായും 101 അംഗ കമ്മിറ്റി രൂപീകരിച്ചു.