കാക്കനാട്: കാക്കനാട്ടിലെ ചില്‍ഡ്രന്‍സ് ഹോമില്‍ നിന്നു നാല് പെണ്‍കുട്ടികളും ജുവനൈല്‍ ഒബ്‌സര്‍വേഷന്‍ ഹോമില്‍ നിന്നും രണ്ട് ആണ്‍കുട്ടികളും ചാടി രക്ഷപെടാന്‍ ശ്രമിച്ചു. ഒരാല്‍ പൊലിസിനെ വെട്ടിച്ച് രക്ഷപ്പെട്ടു. കഴിഞ്ഞ ശനിയാഴ്ച രാത്രി പെണ്‍കുട്ടികളും, ഞായറാഴ്ച രാത്രി ആണ്‍കുട്ടികളുമാണ് ചാടിയത്.
തൃക്കാക്കര സബ് ഇന്‍സ്‌പെക്ടര്‍ ഷാജുവിന്റെ നേത്യത്വത്തില്‍ നടന്ന അന്വേഷണത്തില്‍ എറണാകുളം കെ.എസ്.ആര്‍.ടി.സി. പരിസരത്തുനിന്നും പെണ്‍കുട്ടികള്‍ നാലു പേരെയും എറണാകുളം മേനക, ജെട്ടി പരിസരത്തു നിന്നും മോഷ്ടിച്ചു രക്ഷപെടാന്‍ ശ്രമിച്ച ബൈക്കുമായി രണ്ട് ആണ്‍കുട്ടികളെയും പിടികൂടി. കോട്ടയം, ഇടുക്കി, എറണാകും ജില്ലക്കാരാണ് കുട്ടി കുറ്റവാളികളായ ആണ്‍കുട്ടികള്‍, നിരവധി മോഷണക്കേസിലെ കുറ്റവാളികളാണ് ഇവര്‍.
ജുവനല്‍ ഒപ്‌സര്‍വേഷന്‍ ഹോമിലും, ചില്‍ഡ്രന്‍സ് ഹോമിലും ആവശ്യത്തിന് വാര്‍ഡനോ, കെയര്‍ ടേക്കറോ ഇല്ലാത്തതും, പുറകു വശത്തു കാടുകയറി കിടക്കുന്നതും മതിലിനോടു ചേര്‍ന്ന് മരങ്ങള്‍ നില്‍ക്കുന്നതും കുട്ടി കുറ്റവാളികള്‍ക്കും, പെണ്‍കുട്ടികള്‍ക്കും രക്ഷപെടാന്‍ സഹായകമാകുന്നു. നിലവില്‍ രാത്രകാലങ്ങളില്‍ വേണ്ടത്ര ജീവനക്കാരില്ല എന്നതും, താല്‍ക്കാലിക ജീവനക്കാരെ ജോലിക്ക് നിയമിച്ചതും ഗൗരവകരമായ സുരക്ഷ വീഴ്ചയാണ്.