പാലക്കാട് : ഈമാസം 15ന് ഇന്ദിരാഗാന്ധി മുനിസിപ്പല്‍ സ്റ്റേഡിയത്തില്‍ നടക്കുന്ന സംസ്ഥാന ചലച്ചിത്ര പുരസ്‌കാര സമര്‍പ്പണത്തിനും താരനിശയ്ക്കും പാലക്കാടന്‍ നാട്ടുകലകളുടെ അവതരണത്തോടെ തുടക്കമാകുമെന്ന് സംഘാടകര്‍ അറിയിച്ചു. വൈകിട്ട് നാലുമുതല്‍ ഷഡാനന്‍ ആനിക്കത്തിന്റെയും ജനാര്‍ദ്ദനന്‍ പുതുശ്ശേരിയുടെയും നേതൃത്വത്തിലാണ് പാലക്കാടന്‍ നാട്ടുകലകള്‍ അരങ്ങേറുക. കാര്‍ഷികപ്പാട്ട്, കിഴക്കന്‍ കരകാട്ടം, പൊയ്ക്കുതിരക്കളി, വേട്ടുവന്‍ കണ്യാര്‍പാട്ട്, കാവടിയാട്ടം, കാളകളി, പാണന്‍ പൊറാട്ട് തുടങ്ങിയ കലാരൂപങ്ങളാണ് വേദിയിലെത്തുക. പുരസ്‌കാര വിതരണത്തിന്റെ അനുബന്ധമായി ഇന്ന് (ഒക്ടോബര്‍ 12ന്) പ്രശസ്ത ചിത്രകാരന്‍ ബൈജുദേവിന്റെ നേതൃത്വത്തില്‍ അമ്പതോളം ചിത്രകാരന്‍മാര്‍ ഇന്ദിരാഗാന്ധി മുനിസിപ്പല്‍ സ്റ്റേഡിയത്തില്‍ ഒറ്റ ക്യാന്‍വാസില്‍ ചിത്രം വരയ്ക്കും. ഉച്ചയ്ക്കുശേഷം 2.30ന് സ്റ്റേഡിയത്തില്‍ തയ്യാറാക്കുന്ന പ്രത്യേക പവലിയനില്‍ കേരള ലളിതകലാ അക്കാഡമി ചെയര്‍മാന്‍ എസ്. സത്യപാല്‍ ചിത്രകാര കൂട്ടായ്മ ഉദ്ഘാടനം ചെയ്യും. വൈകിട്ട് അഞ്ചിന് മലയാള സിനിമയുടെ വികാസപരിണാമങ്ങളെക്കുറിച്ചുള്ള പ്രത്യേക പ്രദര്‍ശനവും പുരാവസ്തു-പുരാരേഖ ചരിത്ര പ്രദര്‍ശനവും നിയമ-പിന്നോക്കക്ഷേമ-സാംസ്‌കാരിക വകുപ്പ് മന്ത്രി എ.കെ. ബാലന്‍ ഉദ്ഘാടനം ചെയ്യും. ചലച്ചിത്ര അക്കാഡമി ചെയര്‍മാന്‍ കമല്‍ അധ്യക്ഷത വഹിക്കും. ഇന്നു മുതല്‍ ദിവസവും വൈകിട്ട് ആറുമുതല്‍ വൈവിധ്യമേറിയ കലാപരിപാടികളും വേദിയില്‍ അവതരിപ്പിക്കും. ഇന്ന് മയ്യഴിപ്പുഴയുടെ തീരങ്ങളില്‍ എന്ന കഥാപ്രസംഗം ഡോ. ഹര്‍ഷകുമാര്‍ അവതരിപ്പിക്കും. 13ന് ഉണ്ണികൃഷ്ണന്‍ കീഴില്ലം അവതരിപ്പിക്കുന്ന ഫോക്‌ലോര്‍ അക്കാഡമിയുടെ മുടിയേറ്റ്, 14ന് കേരള കലാമണ്ഡലം അവതരിപ്പിക്കുന്ന വിവിധ കലാരൂപങ്ങള്‍ എന്നിവയുണ്ടാകും.