മുംബൈ: പ്രമുഖ വ്യവസായി ആദി ഗോദ്‌റേജിന്റെ ഭാര്യയും സമൂഹികപ്രവര്‍ത്തകയുമായ പര്‍മേശ്വര്‍ ഗോദ്‌റേജ് (70) അന്തരിച്ചു. ശ്വാസകോശ സംബന്ധമായ അസുഖത്തെ തുടര്‍ന്ന് ദീര്‍ഘനാളായി ചികിത്സയിലായിരുന്നു. മുംബൈയിലെ ആശുപത്രിയിലായിരുന്നു അന്ത്യം. നിരവധി ജീവകാരുണ്യ പ്രവര്‍ത്തനങ്ങളിലും പര്‍മേശ്വര്‍ ഏര്‍പ്പെട്ടിരുന്നു.
എയ്ഡ്‌സിനെതിരായ പ്രവര്‍ത്തനങ്ങളില്‍ ഏറെ സജീവമായിരുന്നു. എയ്ഡ്‌സ് രോഗം തടയുന്നതിനുള്ള ക്ലിന്റണ്‍ ഗ്‌ളോബല്‍ ഇനിഷ്യേറ്റീവിന്റെ 2004 ലെ ഹീറോസ് പ്രോജക്ട് എന്ന പദ്ധതിയുമായി ബന്ധപ്പെട്ടും അവര്‍ പ്രവര്‍ത്തിച്ചിട്ടുണ്ട്. പാക് ക്രിക്കറ്ററായിരുന്ന ഇംറാന്‍ ഖാന്‍ ഉള്‍പ്പെടെയുള്ള പ്രമുഖര്‍ അനുശോചനം രേഖപ്പെടുത്തി. ഒരു എയര്‍ ഹോസ്റ്റസായി ജീവിതമാരംഭിച്ച പര്‍മേശ്വര്‍ ആദി ഗോദ്‌റേജുമായി 1965ലാണ് വിവാഹിതയാവുന്നത്.  സംസ്‌കാരം നടന്നതായി കുടുംബ വൃത്തങ്ങള്‍ അറിയിച്ചു.