തലശ്ശേരി: ധര്‍മ്മടം മണ്ഡലം എല്‍.ഡി.എഫ് സ്ഥാനാര്‍ഥി പിണറായി വിജയന്റെ വിജയത്തിനായ് സ്വരലയയുടെ ആഭിമുഖ്യത്തില്‍ പാലയാട് ചിറക്കുനിയില്‍ വിജയപദം എന്ന പേരില്‍ കലാസന്ധ്യ ഒരുക്കി. അബു-ചാത്തുക്കുട്ടി സ്മാരക സ്റ്റേഡിയത്തില്‍ നടന്ന ചടങ്ങ് കഥാകൃത്ത് ടി.പത്മനാഭന്‍ ഉദ്ഘാടനം ചെയ്തു. തുടര്‍ന്ന് നൂറില്‍പ്പരം കലാകാരന്‍മാര്‍ അണിനിരന്ന കലാസന്ധ്യയും അരങ്ങേറി. കലാസന്ധ്യ സിനിമാ നടന്‍ ജയറാം തിരിതെളിയിച്ച് ഉദ്ഘാടനം ചെയ്തു. സംവിധായകരായ ഷാജി എന്‍ കരുണ്‍, ലെനിന്‍ രാജേന്ദ്രന്‍, രഞ്ജിത്ത്, രഞ്ജിപണിക്കര്‍, ബി ഉണ്ണികൃഷ്ണന്‍, മധുപാല്‍, കവി പ്രഭാവര്‍മ്മ, ഗാനരചയിതാവ് കൈതപ്രം ദാമോദരന്‍ നമ്പൂതിരി എന്നിവര്‍ മുഖ്യതിഥികളായി. നാലുമണിക്കൂര്‍ നീണ്ട കലാസംഗീത വിരുന്നിന് സംവിധായകരായ എം ജയചന്ദ്രന്‍, ഔസേപ്പച്ചന്‍, രമേശ് നാരായണന്‍ എന്നിവര്‍ നേതൃത്വം നല്‍കി. ഗായകരായ മാധുരി, മഞ്ജരി, സുധീപ്കുമാര്‍, പി.കെ മേദിനി, മച്ചാട്ട് വാസന്തി എന്നിവര്‍ ഗാനങ്ങള്‍ ആലപിച്ചു. മട്ടന്നൂര്‍ ശങ്കരന്‍കുട്ടി, കരുണാമൂര്‍ത്തി, പ്രകാശ് ഉള്ള്യേരി, ജോബോയ് മാസ്റ്റര്‍ എന്നിവര്‍ ഒന്നിച്ച് സിംഫണി ഒരുക്കി. രമേശ് നാരായണനും മകള്‍ മധുശ്രീയും സംയുക്തമായി ഗസല്‍ വിരുന്നൊരുക്കി. എരഞ്ഞോളി മൂസയും സംഘവും മാപ്പിളപ്പാട്ടും നാടന്‍പാട്ട് ഗായകന്‍ സി.ജെ കുട്ടപ്പനും സംഘവും നാടന്‍പാട്ടും അവതരിപ്പിച്ചു.കോട്ടയം നസീര്‍, നാദിര്‍ഷാ, പന്തളം ഉല്ലാസ് എന്നിവര്‍ കോമഡിഷോ നയിച്ചു. ജയരാജ് വാര്യരായിരുന്നു അവതാരകന്‍. ദേശീയ-സംസ്ഥാന പുരസ്‌ക്കാര ജേതാക്കളായ എം ജയചന്ദ്രന്‍, ഔസേപ്പച്ചന്‍, രമേശ് നാരായണന്‍, മധുശ്രീ എന്നിവരെ പിണറായി വിജയന്‍ ആദരിച്ചു.