തിരുവനന്തപുരം: സംസ്ഥാന സര്‍ക്കാരിന്റെ വികലാംഗക്ഷേമനയം അവസാന മിനുക്ക് പണികളില്‍. വികലാംഗക്ഷേമത്തിനായി പ്രത്യേക വകുപ്പ് രൂപീകരിക്കുന്നതുള്‍പ്പെടെയുള്ള സുപ്രധാന പ്രഖ്യാപനങ്ങള്‍ ഇതിലുണ്ടാകും. അംഗപരിമിതരുടെ മക്കള്‍ക്ക് നൂറ്ശതമാനം സ്‌കൂള്‍ പ്രവേശനം ഉറപ്പുവരുത്തുക,സര്‍ക്കാരിന്റെ ഗൃഹനിര്‍മാണ പദ്ധതികളില്‍ അംഗപരിമിതര്‍ക്ക് ആറ് ശതമാനം ഭവനങ്ങള്‍ ഉറപ്പു വരുത്തുക എന്നിവ ഇതില്‍ പ്രാധാന്യത്തോടെ ഉള്‍പ്പെടുത്തിയിട്ടുണ്ട്.
അംഗപരിമിതി നേരിടുന്ന വ്യക്തികളുടെ വികാസവും പരിരക്ഷയും ഉറപ്പുവരുത്തുകയാണ് വികലാംഗക്ഷേമനയം കൊണ്ട് ലക്ഷ്യമിടുന്നത്. തൊഴിലവസരങ്ങളും സാമ്പത്തിക നിലവാരവും വര്‍ധിപ്പിച്ച് അംഗപരിമിതരെ മുഖ്യധാരയിലേക്ക് കൊണ്ടുവരികയാണ് പ്രധാനലക്ഷ്യം. സമൂഹത്തിന് ഇവരോടുള്ള വിരുദ്ധ മനോഭാവത്തിന് മാറ്റം വരുത്തുക, ഒപ്പം ഇരകള്‍ എന്ന ബോധം ഇല്ലാതാക്കുക എന്നീ ലക്ഷ്യങ്ങളോടെയുള്ള ബോധവല്‍ക്കരണ പരിപാടികളും ലക്ഷ്യമിടുന്നു.
അംഗപരിമിതര്‍ക്ക് തടസങ്ങള്‍ കൂടാതെ യാത്ര ചെയ്യാന്‍ അനുയോജ്യമായ രീതിയില്‍ പൊതുഗതാഗത സംവിധാനത്തില്‍ മാറ്റങ്ങള്‍ വരുത്തുന്നതിനെക്കുറിച്ചും ആലോചനയുണ്ട്. അംഗപരിമിതര്‍ക്ക് സഞ്ചരിക്കാവുന്ന മുച്ചക്രവാഹനങ്ങള്‍ ഉള്‍പ്പെടെയുള്ളവ കുറഞ്ഞ നിരക്കില്‍ വിപണിയിലിറക്കാനാവശ്യമായ പ്രോത്സാഹനങ്ങള്‍ ലഭ്യമാക്കും. കാര്യക്ഷമമായ ആശയവിനിമയത്തിന് സഹായകരമായ രീതിയില്‍ വിവരസാങ്കേതിക വിദ്യയില്‍ അംഗപരിമിതര്‍ക്ക് അറിവ് പകര്‍ന്നു നല്‍കാനുള്ള പദ്ധതികളും തയാറാക്കും. വികലാംഗക്ഷേമനയം ഉടന്‍ പ്രഖ്യാപിക്കുകയും വികലാംഗക്ഷേമ വകുപ്പ് രൂപീകരിച്ച് പ്രവര്‍ത്തനങ്ങള്‍ ത്വരിതപ്പെടുത്താനുമുള്ള നടപടികളിലാണ് സാമൂഹ്യനീതി വകുപ്പ്.