കായംകുളം: അടിസ്ഥാന സൗകര്യങ്ങളില്ലാതെ നഗരസഭാ ലൈബ്രറി ശോച്യാവസ്ഥയില്‍.കമ്പ്യൂട്ടര്‍വല്‍ക്കരിച്ച ലൈബ്രറിയിലെ കമ്പ്യൂട്ടര്‍ തകരാറിലായിട്ട് മൂന്നുവര്‍ഷം.അമൂല്യങ്ങളായ ഗ്രന്ഥങ്ങളുള്‍പ്പെടെ പന്തീരായിരത്തനു മുകളില്‍ പുസ്തകങ്ങള്‍ അനാഥമായി കിടക്കുന്നു.
നാലുവര്‍ഷം മുമ്പ് ലൈബ്രറി കമ്പ്യൂട്ടര്‍വല്‍ക്കരിച്ചതോടെ വായനക്കാരനാവശ്യമായ പുസ്തകങ്ങള്‍ അലമാരകളില്‍ തപ്പിനോക്കാതെ പുസ്തകത്തെപ്പറ്റിയുള്ള വിശദീകരണം ലൈബ്രറി നടത്തിപ്പുകാരന് പറയാനാകുമായിരുന്നു.
എന്നാല്‍ യന്ത്രം തകരാറായതോടെ എല്ലാം താറുമാറായി.ഒരുലക്ഷം രൂപക്കു മുകളില്‍ ചിലവാക്കിയാണ് ലൈബ്രറി കമ്പൂട്ടര്‍വല്‍ക്കരിച്ചത്.എന്നാല്‍ ഇത് തകരാറിലായി വര്‍ഷങ്ങള്‍ കഴിഞ്ഞിട്ടും തകരാറ് പരിഹരിക്കാന്‍ നടപടികള്‍ ആയിട്ടില്ല. രാവിലെ 8 മുതല്‍ 11 വരെയും 4മുതല്‍ 7 വരെയുമാണ് പ്രവര്‍ത്തന സമയം.എന്നാല്‍ ഇത്രയും അമൂല്യ ഗ്രന്ഥങ്ങളുള്ള ഒരു ലൈബ്രറി ഇവിയെയുണ്ടെന്ന് ആര്‍ക്കുംതന്നെ അിറയില്ല.ലൈബ്രറി നഗരസഭാ കെട്ടിടത്തിലായിരുന്ന കാലത്ത് ഫോണ്‍സൗകര്യം ഉണ്ടായിരുന്നു എന്നാല്‍ പുതിയ കെട്ടിടത്തിലേക്ക് മാറ്റിയതോടെ ഫോണ്‍സൗകര്യവും ഇല്ലാതെയായി. സര്‍വ്വ വിജ്ഞാനകോശം,വിശ്വവിജ്ഞാനകോശം,ഇസ്ലാമിക വിജ്ഞാനകോശം,ആയുര്‍വ്വേദ മെഡിക്കല്‍ വിദ്യാര്‍ത്ഥികള്‍ക്ക് റഫറന്‍സിനു വേണ്ട പുരാതന ചികിത്സാരീതികളെപ്പറ്റിയുള്ള ഗ്രന്ഥങ്ങള്‍,സാഹിത്യകൃതികള്‍,ഹിന്ദുപുരാണങ്ങള്‍,എല്ലാ മതങ്ങളുടേയും പുരാണ ഗ്രന്ഥങ്ങള്‍,നാടകം,നോവല്‍,ഇഎംഎസ് സമ്പൂര്‍ണ്ണ കൃതികള്‍ തുടങ്ങി പന്ത്രണ്ടായിരത്തില്‍പരം പുസ്തകങ്ങളും ഗ്രന്ഥങ്ങളും പതിനെട്ടോളം പത്രപ്രസിദ്ധീകരണങ്ങള്‍,പതിനഞ്ചോളം ആനുകാലിക പ്രസിദ്ദീകരണങ്ങള്‍ എല്ലാം ഈ ലൈബ്രറിയിലുണ്ട്.അവയെല്ലാം കമ്പൂട്ടറില്‍ നോക്കി അവ ഇരിക്കുന്ന സ്ഥാനവും റാക്കും വരെ നിമിഷങ്ങള്‍ക്കുള്ളില്‍ കണ്ടുപിടിച്ച് ആവശ്യക്കാര്‍ക്ക് എടുത്തുകൊടുക്കാന്‍ മുമ്പ് സാധിച്ചിരുന്നു.
ഇപ്പോള്‍ പല പുസ്ഥകങ്ങളും എവിടെയാണെന്ന് കണ്ടുപിടിക്കാന്‍ സാധിക്കാതെ കൂട്ടിയിട്ടിരിക്കുന്ന സാഹചര്യമാണ്.
ആയിരക്കണക്കിന് പുസ്തകങ്ങള്‍ പലരും കൊണ്ടുപോയിട്ട് തിരികെ ഏല്‍പ്പിച്ചിട്ടില്ല.സ്‌കൂള്‍,കോളേജ് വിദ്യാര്‍ഥികള്‍ക്ക് ഏറെ പ്രയോജനകരമായ ഈ ലൈബ്രറിയുടെ ശോച്യാവസ്ഥക്ക് അധികൃതര്‍ പരിഹാരം കാണണമെന്ന ആവശ്യം ഉയര്‍ന്നിരിക്കയാണ്.