തൊടുപുഴ: അപ്രോച്ച് റോഡ് നിര്‍മാണം വൈകുന്നത് മൂലം നോക്കുകുത്തിയായ മാരിയില്‍ കലുങ്ക് പാലത്തിന് പുതുജീവന്‍ വെയ്ക്കുന്നു.
സ്ഥലം ഏറ്റെടുക്കല്‍ സംബന്ധിച്ച തര്‍ക്കത്തിന് പരിഹാരമായില്ലെങ്കിലും പാലത്തിന്റെ അപ്രോച്ച് റോഡ് നിര്‍മ്മാണം ആരംഭിക്കാന്‍ പൊതുമരാമത്ത് വകുപ്പ് നടപടിതുടങ്ങി. ആദ്യഘട്ടമായി മാരിയില്‍കടവ് ഭാഗത്തെ അപ്രോച്ച്‌റോഡ് നിര്‍മ്മാണത്തിനാണ് തുടക്കംകുറിക്കുന്നത്. പാലത്തിന്റെ കാഞ്ഞിരമറ്റം ഭാഗത്ത് അപ്രോച്ച്‌റോഡിനു വേണ്ടി സ്ഥലമേറ്റെടുക്കല്‍ ഇനിയും പൂര്‍ത്തിയായിട്ടില്ല. സ്ഥലമുടമകളുമായി വില സംബന്ധിച്ച തര്‍ക്കം തുടരുകയാണ്. തര്‍ക്കം പരിഹരിക്കുന്ന മുറയ്ക്ക് മറുഭാഗത്തും അപ്രോച്ച്‌റോഡ് നിര്‍മ്മിക്കാനാണ് നീക്കം.
തൊടുപുഴ-ഇടുക്കി റോഡില്‍ മാരിയില്‍കലുങ്ക് ഭാഗത്ത് നിന്നും പാലത്തിലേക്കുള്ള വഴി മണ്ണിട്ട് ഉയര്‍ത്തി മൂന്നരമീറ്റര്‍ വീതിയിലാണ് ആദ്യം ടാര്‍ ചെയ്യുക. ഭാവിയില്‍ വീതി കൂട്ടി ഇരുവശത്തും ഓടകള്‍ നിര്‍മ്മിക്കാനും പദ്ധതിയുണ്ട്. മറ്റു തടസങ്ങള്‍ നേരിട്ടില്ലെങ്കില്‍ ഈ ഭാഗത്തെ അപ്രോച്ച്‌റോഡ് ഒന്നരമാസത്തിനുള്ളില്‍ പൂര്‍ത്തിയാക്കാന്‍ കഴിയുമെന്നാണ് പിഡബ്ല്യുഡി അധികൃതരുടെ പ്രതീക്ഷ. എന്നാല്‍, ഇരുഭാഗത്തും അപ്രോച്ച്‌റോഡുകള്‍ പൂര്‍ത്തിയായെങ്കില്‍ മാത്രമേ പാലം വാഹനഗതാഗതത്തിന് സജ്ജമാവുകയുള്ളൂ.
അസിസ്റ്റന്റ് എക്‌സിക്യൂട്ടീവ് എന്‍ജിനീയര്‍ അടക്കമുള്ള ഉദ്യോഗസ്ഥര്‍ തിങ്കളാഴ്ച സ്ഥലം സന്ദര്‍ശിച്ച് നിര്‍മ്മാണപ്രവര്‍ത്തനങ്ങള്‍ സംബന്ധിച്ച് ചര്‍ച്ച ചെയ്തു. മാരിയില്‍ കലുങ്കില്‍ ഇടുക്കി- തൊടുപുഴ റോഡിന് അടിയിലൂടെ പുഴയിലേക്ക് ഒരു തോട് കടന്നുപോകുന്നുണ്ട്. കലുങ്കിന് താഴെ സ്ഥാപിച്ചിട്ടുള്ള വലിയ രണ്ട് കുഴലുകളിലൂടെയാണ് നിലവില്‍ വെള്ളം ഒഴുകിപ്പോകുന്നത്. ഇത് മാറ്റി സ്ഥാപിക്കേണ്ടതുണ്ട്. പുതിയ പൈപ്പുകള്‍ ഇതിനായി എത്തിക്കും.
അഞ്ചുകോടി 27 ലക്ഷം രൂപ ചെലവിട്ടാണ് തൊടുപുഴ നഗരസഭയുടെ 23, 27 വാര്‍ഡുകളെ ബന്ധിപ്പിച്ച് മാരിയില്‍കടവില്‍ പിഡബ്ല്യുഡി പാലം പൂര്‍ത്തിയാക്കിയത്. 4.80 കോടി മുടക്കിയാണ് പാലം പൂര്‍ത്തിയാക്കിയത്. ബാക്കി തുക പ്രവേശനപ്പാതയ്ക്കായാണു നീക്കിവച്ചിരുന്നത്. ഭൂമിവിലയെക്കുറിച്ചും പണം കൈമാറുന്നത് സംബന്ധിച്ചും വ്യക്തമായ ഉറപ്പില്ലാതെ സ്ഥലം കൈമാറില്ലെന്ന നിലപാടിലാണ് സ്ഥലം ഉടമകള്‍.
ബസ് സര്‍വീസില്ലാത്ത കാഞ്ഞിരമറ്റം മേഖലയുടെ വികസനത്തിന് ഏറെ പ്രതീക്ഷ നല്‍കുന്ന ഒന്നാണ് മാരിയില്‍ കടവ് പാലം. തൊടുപുഴ നഗരത്തില്‍ എത്താതെ തന്നെ വാഹനങ്ങള്‍ക്ക് മറ്റിടങ്ങളിലേക്ക് പോകാന്‍ കഴിയുമെന്നതും ഈ പാലത്തിന്റെ പ്രധാന്യം വിളിച്ചോതുന്നതാണ്. കാഞ്ഞിരമറ്റം മേഖലയുടെ വികസനത്തിന് ഏറെ പ്രതീക്ഷ നല്‍കുന്നതാണ് മാരിയില്‍ കലുങ്ക് പാലം.