ബാലുശ്ശേരി: കഴിഞ്ഞ ദിവസം ബാലുശ്ശേരി ടൗണിലെ ജ്വല്ലറിയില്‍ നിന്ന് സ്വര്‍ണാഭരണം മോഷണം നടത്തിയ പര്‍ദ്ദധാരിയായ യുവതിയെ ബാലുശ്ശേരി പൊലിസ് അറസ്റ്റു ചെയ്തു.
കൊടുവള്ളിക്കടുത്ത് മാനിപുരം കച്ചേരികുന്നുമ്മല്‍ റംസിത (29)യാണ് അറസ്റ്റിലായത്. ഇവരെ പേരാമ്പ്ര കോടതിയില്‍ ഹാജരാക്കി.
ശനിയാഴ്ച ഉച്ചയ്ക്ക് പന്ത്രണ്ടോടെയാണ് യുവതി ഒരു കുട്ടിയോടൊപ്പം ആഭരണങ്ങള്‍ വാങ്ങാനെന്ന വ്യാജേന ജ്വല്ലറിയിലെത്തിയത്. തെരഞ്ഞെടുക്കുന്നതിനിടയില്‍ ഒരു നെക്‌ളൈസ് മോഷണം നടത്തുന്നത് സി.സി ടിവിയില്‍ പതിഞ്ഞിരുന്നു.
ജ്വല്ലറി ഉടമയുടെ പരാതിയെ തുടര്‍ന്ന് ബാലുശ്ശേരി എസ്.ഐ വി. സിജിത്ത്, എ.എസ്.ഐ ശ്രീജയന്‍ എന്നിവര്‍ നടത്തിയ അന്വേഷണത്തിലാണ് പ്രതി പിടിയിലായത്.
മോഷ്ടിച്ച ആഭരണം പൂനൂരിലെ ജ്വല്ലറിയില്‍ വില്‍പ്പന നടത്തിയതായുള്ള പ്രതിയുടെ മൊഴിയുടെ അടിസ്ഥാനത്തില്‍ പൊലിസ് ജ്വല്ലറിയിലെത്തി ആഭരണം വീണ്ടെടുത്തു.