ദുബൈ: വെസ്റ്റിന്‍ഡീസിനെതിരായ ഒന്നാം ക്രിക്കറ്റ് ടെസ്റ്റില്‍ പാകിസ്താന് 56 റണ്‍സ് വിജയം. 346 റണ്‍സ് വിജയ ലക്ഷ്യവുമായി രണ്ടാമിന്നിങ്‌സ് ബാറ്റിങിനിറങ്ങിയ വിന്‍ഡീസ് 289 റണ്‍സിനു എല്ലാവരും പുറത്തായി.
സ്‌കോര്‍: പാകിസ്താന്‍ ഒന്നാം ഇന്നിങ്‌സ് മുന്നിന് 579 ഡിക്ല. രണ്ടാം ഇന്നിങ്‌സ് 123. വെസ്റ്റിന്‍ഡീസ് ഒന്നാം ഇന്നിങ്‌സ് 357, രണ്ടാം ഇന്നിങ്‌സ് 289.
116 റണ്‍സ് നേടി ഒറ്റയാള്‍ പോരാട്ടം നടത്തിയ ഡാരന്‍ ബ്രാവോയുടെ ഉജ്ജ്വല ഇന്നിങ്‌സിനും വിന്‍ഡീസിനെ വിജയിപ്പിക്കാന്‍ സാധിച്ചില്ല. 40 റണ്‍സോടെ ക്യാപ്റ്റന്‍ ഹോള്‍ഡര്‍ പുറത്താകാതെ നിന്നു. പാക് നിരയില്‍ മുഹമ്മദ് ആമിര്‍ മൂന്നു വിക്കറ്റുകള്‍ വീഴ്ത്തി. യാസിര്‍ ഷ, മുഹമ്മദ് നവാസ് എന്നിവര്‍ രണ്ടു വിക്കറ്റുകളെടുത്തു.
രണ്ടിന് 95 എന്ന നിലയിലാണ് അഞ്ചാം ദിനം വിന്‍ഡീസ് ബാറ്റിങിനിറങ്ങിയത്. ഒരറ്റത്ത് വിക്കറ്റുകള്‍ കൊഴിഞ്ഞപ്പോഴും പതറാതെ പോരാടിയ ബ്രാവോ വിന്‍ഡീസിനെ ഒറ്റയ്ക്ക് തോളിലേറ്റി. ആറാമനായി ക്രീസിലെത്തിയ ചെയ്‌സ് 35 റണ്‍സുമായി ബ്രാവോയ്ക്ക് പിന്തുണ നല്‍കി.
പിന്നീട് ഏഴാം വിക്കറ്റില്‍ ബ്രാവോ- ഹോള്‍ഡര്‍ സഖ്യം 69 റണ്‍സ് നേടി വിജയപ്രതീക്ഷ ഉയര്‍ത്തി. എന്നാല്‍ സ്വന്തം പന്തില്‍ ബ്രാവോയെ കൈകളിലൊതുക്കി യാസിര്‍ ഷാ കൂട്ടുകെട്ടു പൊളിച്ചു പാക് നിരയെ മത്സരത്തിലേക്ക് തിരികെയെത്തിച്ചു. പിന്നീട് ചടങ്ങു തീര്‍ക്കുന്ന ബാധ്യത മാത്രമേ പാകിസ്താനുണ്ടായിരുന്നുള്ളു. ആദ്യ ഇന്നിങ്‌സില്‍ ട്രിപ്പിള്‍ സെഞ്ച്വറിയിലൂടെ പാകിസ്താനു കൂറ്റന്‍ സ്‌കോര്‍ സമ്മാനിച്ച അസ്ഹര്‍ അലി കളിയിലെ കേമനായി.
മൂന്നു മത്സരങ്ങളടങ്ങിയ ടെസ്റ്റ് പരമ്പരയിലെ രണ്ടാം മത്സരം ഈ മാസം 21 മുതല്‍ ആരംഭിക്കും.