പഴയങ്ങാടി: കിഫ്ബി(ഇന്‍ഫ്രാസ്ട്രക്ചര്‍ ഇന്‍വെസ്റ്റ്‌മെന്റ് ഫണ്ട് ബോര്‍ഡ്)യില്‍ ഉള്‍പ്പെടുത്തുന്നതിനായി ബജറ്റില്‍ പ്രഖ്യാപിച്ച റോഡുകളുടെ വിശദമായ എസ്റ്റിമേറ്റ് ഉടന്‍ സമര്‍പ്പിക്കുവാന്‍ മന്ത്രി ജി സുധാകരന്റെ നിര്‍ദേശം. തിരുവനന്തപുരത്തു ചേര്‍ന്ന കല്ല്യാശ്ശേരി മണ്ഡലത്തിലെ പൊതുമരാമത്ത് നടപ്പിലാക്കി വരുന്ന പ്രവൃത്തികളുടെ അവലോകന യോഗത്തിലാണു നിര്‍ദേശം.
തളിപ്പറമ്പ്-പട്ടുവം-ചെറുകുന്ന് റോഡ്,  പുന്നകടവ്-പുതിയപുഴക്കര-ഏഴിമല റെയില്‍വേ സ്റ്റേഷന്‍ ഏഴിലോട് റോഡ് എന്നീ റോഡുകളുടെ എസ്റ്റിമേറ്റുകള്‍ തയാറാക്കിട്ടുണ്ട്. ചന്തപ്പുര-പരിയാരം മെഡിക്കല്‍ കോളജ്, ശ്രീസ്ത, ഏഴോം, കോട്ടക്കീല്‍, പട്ടുവം, വെള്ളിക്കീല്‍, ഒഴക്രോം കണ്ണപുരം റോഡിന്റെയും കുപ്പം, ചുടല, പാണപ്പുഴ, കണാരംവയല്‍ റോഡിന്റെയും വിശദമായ എസ്റ്റിമേറ്റ് കിഫ്ബിയില്‍ ഉള്‍പ്പെടുത്തുന്നതിന് ഉടന്‍ സമര്‍പ്പിക്കും. ഏഴിമല നേവല്‍ അക്കാദമിലേക്കുള്ള മാടായി വെങ്ങര മുട്ടം പാലക്കോട് എട്ടികുളം ഹൈസ്‌കൂള്‍ റോഡിന്റെ  ആദ്യഭാഗവും വെങ്ങര റെയില്‍വേ ഓവര്‍ ബ്രിഡ്ജും കിഫ്ബിയില്‍ ഉള്‍പ്പെടുത്താന്‍ തീരുമാനിച്ചു.
ബജറ്റില്‍ അംഗീകരിച്ച പഴയങ്ങാടി മൊട്ടാമ്പ്രം പുതിയങ്ങാടി മാട്ടൂല്‍ റോഡ് (മൂന്നാംഘട്ടം), കീച്ചേരി അഞ്ചാംപീടിക റോഡ്, ഇരിണാവ് മടക്കര റോഡ് എന്നിവയുടെ വിശദമായ എസ്റ്റിമേറ്റ് ഭരണാനുമതിക്കായി സമര്‍പ്പിക്കാനും യോഗം തീരുമാനിച്ചു. അവസാനഘട്ട പ്രവൃത്തി നടക്കുന്ന പട്ടുവം കോട്ടക്കീല്‍ കടവ് പാലത്തിന്റെ നിര്‍മാണം നവംബറില്‍ പൂര്‍ത്തികരിക്കണമെന്നു മന്ത്രി ആവശ്യപ്പെട്ടു. 16.45 കോടി രൂപയുടെ ഭരണാനുമതി ലഭിച്ച ഇരിണാവ് പാലത്തിന്റെ നെഗോഷ്യസ് പര്‍ച്ചേഴ്‌സ് പ്രകാരം ഭൂമി ഏറ്റെടുക്കുന്നതിനു 42,38,517 രൂപ അനുവദിച്ച് ഉത്തരവായിരുന്നു.
ഭൂമി രജിസ്റ്റര്‍ ചെയ്യുന്നതിനുള്ള ഗവണ്‍മെന്റ് ഉത്തരവ് ഉടന്‍ പുറപ്പെടുവിക്കുന്നതിനു നടപടി സ്വീകരിക്കും. നിലവിലുള്ള പാലം അപകടാവസ്ഥയില്‍ ആയതിനാല്‍ പ്രത്യേക ഭരണാനുമതി ലഭ്യമാക്കുന്നതിനും തീരുമാനിച്ചു. ബജറ്റില്‍ പ്രഖ്യാപിച്ച മൂലക്കീല്‍ കടവ് പാലം, കാവിന്‍ മുനമ്പ് പാലം എന്നിവയുടെ വിശദമായ എസ്റ്റിമേറ്റ് തയാറാക്കി കിഫ്ബിയില്‍ ഉള്‍പ്പെടുത്തും. ചെറുതാഴം കുറ്റൂര്‍ പെരിങ്ങോം റോഡിലെ  വണ്ണാത്തിക്കടവ് പാലത്തിന്റെ വിശദമായ എസ്റ്റിമേറ്റ് തയാറാക്കി സമര്‍പ്പിക്കുന്നതിനും യോഗം തീരുമാനിച്ചു.
ടി.വി രാജേഷ് എം.എല്‍.എ, പൊതുമരാമത്ത് ചീഫ് എന്‍ജിനീയര്‍ പി.കെ സതീശന്‍, എക്‌സി. എന്‍ജിനീയര്‍ ഇ.ജി വിശ്വപ്രകാശ്, ദേശീയപാത വിഭാഗം എക്‌സി. എന്‍ജിനീയര്‍ പി.കെ മിനി, വി.വി ജയലക്ഷ്മി,  അസി.എക്‌സി.എന്‍ജിനിയര്‍മാര്‍, എ.ഇമാര്‍ എന്നിവര്‍ പങ്കെടുത്തു.


.