പൂനൂര്‍: പെരിങ്ങളം വയല്‍ കേന്ദ്രീകരിച്ച് അനധികൃതമായി വിദേശമദ്യവില്‍പ്പന നടത്തിയ ആളെ എക്‌സൈസ് സംഘം അറസ്റ്റു ചെയ്തു. പൂനൂര്‍  കക്കാട്ടുമ്മല്‍ അഷ്‌റഫ് (52) ആണ് അറസ്റ്റിലായത്.
ഇയാളില്‍ നിന്ന് പത്തു കുപ്പി വിദേശമദ്യം പിടിച്ചെടുത്തു. ഇന്നലെ ഉച്ചയോടെ ബാലുശ്ശേരി എക്‌സൈസ് റെയിഞ്ച് ഇന്‍സ്‌പെക്ടര്‍ ആര്‍.എന്‍ ബൈജുവും സംഘവും നടത്തിയ പരിശോധനയിലാണ് ഇയാള്‍ പിടിയിലായത്.  മാഹിയില്‍ നിന്നാണ് വിദേശമദ്യം കൊണ്ടുവന്ന് രഹസ്യമായി ആളുകള്‍ക്ക് വില്‍പ്പന നടത്തി വരികയായിരുന്നു.
സംശയാസ്പദമായ സാഹചര്യത്തില്‍ ആളുകള്‍ വരുന്നത് ശ്രദ്ധയില്‍പെട്ട പ്രദേശവാസികള്‍ മദ്യവില്‍പ്പനയുണ്ടെന്ന് തിരിച്ചറിഞ്ഞതോടെ നേരത്തെ പൊലിസിലും എക്‌സൈസിലും പരാതി നല്‍കിയിരുന്നു. കഴിഞ്ഞ ജനുവരിയില്‍ മദ്യവില്‍പ്പന നടത്തിയതിനെ തുടര്‍ന്ന് ഇയാള്‍ക്കെതിരേ കേസെടുത്തെങ്കിലും പിന്നീട് ജാമ്യത്തിലിറങ്ങിയതാണ്.
അസി. എക്‌സൈസ് ഇന്‍സ്‌പെക്ടര്‍ ഐ.എം കരുണാകരന്‍, സിവില്‍ എക്‌സൈസ് ഓഫിസര്‍മാരായ സുബീഷ്, അനില്‍കുമാര്‍, മനോജ് എന്നിവരുടെ നേതൃത്വത്തിലുള്ള സംഘമാണ് പ്രതിയെ പിടികൂടിയത്. കൊയിലാണ്ടി കോടതിയില്‍ ഹാജരാക്കി റിമാന്റു ചെയ്തു.