കൊണ്ടോട്ടി: മാരകായുധങ്ങളുമായി രണ്ടുപേരെ കൊണ്ടോട്ടി പൊലിസ് പിടികൂടി. നിരവധി കേസുകളില്‍ പ്രതിയായ പുളിക്കല്‍ വായനൊടി പുറായി വാനമ്പാടിയില്‍ ഷൈജു(39), കൂട്ടാളിയായ കൊണ്ടോട്ടി കാളോത്ത് രാമച്ചംപറമ്പില്‍ മുബാറക്(26) എന്നിവരെയാണു കൊണ്ടോട്ടി പൊലിസ് അറസ്റ്റ് ചെയ്തത്.
ചൊവാഴ്ച്ച രാത്രി എട്ടോടെ പുളിക്കല്‍ ആന്തിയൂര്‍ കുന്നില്‍വെച്ചാണ് ഇരുവരെയും കൊണ്ടോട്ടി എസ്.ഐ. കെ.എ. സാബുവിന്റെ നേതൃത്വത്തിലുള്ള സംഘം അറസ്റ്റ് ചെയ്തത്. ഇവര്‍ സഞ്ചരിച്ച കാറും പൊലീസ് പിടികൂടി. വാഹനത്തില്‍ നിന്നു വടിവാളും അക്രമത്തിനായി പ്രത്യേകമായി നിര്‍മിച്ച കത്തിയും പൊലിസ് കണ്ടെത്തി.
മാരകായുധങ്ങള്‍ കൈവശം വെച്ചതിനാണ് ഇവര്‍ക്കെതിരേ പൊലീസ് കേസ് രജിസ്റ്റര്‍ ചെയ്തിരിക്കുന്നത്. ഷൈജുവിനെതിരേ നിലവില്‍ കൊണ്ടോട്ടി പൊലിസ് പുറപ്പെടുവിച്ച വാറണ്ട് നിലവിലുണ്ട്.
ഇതിനു പുറമെ കോഴിക്കോട് ടൗണ്‍, കസബ, വെളളയില്‍ സ്റ്റേഷനുകളിലായി അടിപിടി, കഞ്ചാവ് കേസുകളും നിലവിലുണ്ട്.
സ്റ്റേറ്റ് സ്‌പെഷല്‍ ഇന്‍വെസ്റ്റിഗേഷന്‍ അംഗങ്ങളായ ശശി കുണ്ടറക്കാട്, അബ്ദുല്‍ അസീസ്, സത്യനാഥന്‍ എന്നിവരടങ്ങുന്ന സംഘമാണു പ്രതികളെ പിടികൂടിയത്.