പരപ്പനങ്ങാടി: ട്രെയിനില്‍ നിന്നു വീണു യുവതിക്കു പരുക്ക്. പത്തനംതിട്ട സ്വദേശി ടി.എം നിഷ(37)ക്കാണു പരുക്കേറ്റത്. പരപ്പനങ്ങാടി റെയില്‍വേ സ്റ്റേഷനില്‍ ഇന്നലെ വൈകുന്നേരംനാലിനാണു സംഭവം. പരശുറാം എക്‌സ്പ്രസില്‍ നിന്നു പ്ലാറ്റ്‌ഫോമിലേക്ക് ഇറങ്ങുന്നതിനിടെ തട്ടി വീഴുകയായിരുന്നു.
തിരൂരിലേക്കു പോകേണ്ട യുവതി അറിയാതെ കോഴിക്കോട് ഭാഗത്തേക്കുള്ള തീവണ്ടിയില്‍ മാറി കയറിയതാണെന്നും അതു തിരിച്ചറിഞ്ഞു ഭാരമുള്ള രണ്ടു ബാഗുകളുമായി ഇറങ്ങാനുള്ള തിരക്കിനിടയിലാണു പ്ലാറ്റ് ഫോമിലേക്കു വീണതെന്നും മറ്റു യാത്രക്കാര്‍ പറഞ്ഞു. വീഴ്ചയില്‍ കൈയില്‍ നിന്നും തെറിച്ചുവീണ മൊബൈല്‍ഫോണ്‍ ആരോ മോഷ്ടിച്ചതായും യാത്രക്കാര്‍ പറഞ്ഞു. ദേഹാസ്വാസ്ഥ്യമനുഭവപ്പെട്ട നിഷയെ യാത്രക്കാരും റെയില്‍വേ ജീവനക്കാരും ചേര്‍ന്നു പരപ്പനങ്ങാടിയിലെ സ്വകാര്യാശുപത്രിയില്‍ പ്രവേശിപ്പിച്ചു.