കണ്ണൂര്‍: വൃക്കരോഗികളുടെ ചികിത്സയ്ക്കായി കിഴുന്ന സിം പബ്ലിക്ക് സ്‌കൂള്‍ വിദ്യാര്‍ഥികള്‍ പരിസ്ഥിതി സൗഹൃദ ജീവകാരുണ്യ പ്രവര്‍ത്തനമെന്ന ആശയുമായി പാഴ്‌വസ്തുക്കള്‍ ശേഖരിച്ചു തുടങ്ങി. ജില്ലാപഞ്ചായത്തിന്റെ സ്‌നേഹജ്യോതി സൊസൈറ്റിക്കായി പണം കണ്ടെത്താനാണു വിദ്യാര്‍ഥികള്‍ പുത്തന്‍ ആശയവുമായി രംഗത്തുവന്നത്. വീടുകളിലെ ഉപയോഗശൂന്യമായ വസ്തുക്കള്‍ ശേഖരിക്കുകയും അതു വിറ്റുകിട്ടുന്ന തുക സ്‌നേഹജ്യോതിക്കു കൈമാറുകയും ചെയ്യും.
ന്യൂസ് പേപ്പറുകള്‍, ഉപയോഗ ശൂന്യമായ പ്ലാസ്റ്റിക് സാധനങ്ങള്‍ എന്നിവയാണു വീടുകളില്‍ നിന്നു ശേഖരിക്കുന്നത്. റിട്ട. എ.ഇ.ഒ സി കൃഷ്ണന്‍ നായര്‍ സ്‌കൂള്‍ ലീഡര്‍ കെ.വി അയോണക്കു നല്‍കി ഉദ്ഘാടനം ചെയ്തു. ടി ഷജില്‍, ജനു ആയിച്ചാന്‍കണ്ടി, കെ.വി അജിത്ത്കുമാര്‍, രസിക ഹരിദാസ്, പി.കെ ബിജി, പി സഞ്ജന, കെ.പി ഷിംന, കെ.വി ജ്യോതി പങ്കെടുത്തു.