ആനക്കയം: ഇരുമ്പുഴി ജി.എച്ച്.എസ്.എസില്‍ നടന്ന മലപ്പുറം ഉപജില്ല ശാസ്‌ത്രോത്സവത്തില്‍ പ്രവൃത്തിപരിചയമേളയില്‍ തത്സമയ നിര്‍മാണ മത്സരത്തിലും പ്രദര്‍ശന മത്സരത്തിലും ഒന്നാം സ്ഥാനം നേടി ഇരട്ട ചാമ്പ്യന്‍പട്ടം കരസ്ഥമാക്കി പാണായി എ.എം.എല്‍.പി സ്‌കൂള്‍ വെങ്ങാലൂര്‍ തുടര്‍ച്ചയായി ഓവറോള്‍ ചാംപ്യന്മാരായി.
തത്സമയ നിര്‍മാണ മത്സരത്തില്‍ മത്സരിച്ച പത്തില്‍ ഏഴിലും എ ഗ്രേഡ് നേടി ഒന്നാംസ്ഥാനവും ഒന്നില്‍ എ ഗ്രേഡും നേടി രണ്ടാം സ്ഥാനവും കരസ്ഥമാക്കി. വുഡ്‌വര്‍ക്ക്, മെറ്റല്‍ എന്‍ഗ്രേവിങ്, വുഡ് കാര്‍വിങ്, വോളിബോള്‍ നെറ്റ് നിര്‍മാണം, ചവിട്ടി നിര്‍മാണം, മുള, ചിരട്ട ഇവകൊണ്ടുള്ള ഉത്പന്നങ്ങള്‍ എന്നിവയില്‍ ഒന്നാം സ്ഥാനവും ഷീറ്റ് മെറ്റല്‍ വര്‍ക്കില്‍ രണ്ടാം സ്ഥാനവും നേടി.
ഗണിത മാഗസിനില്‍ രണ്ടാം സ്ഥാനവും സാമൂഹ്യശാസ്ത്ര മോഡലില്‍ മൂന്നാം സ്ഥാനവും കരസ്ഥമാക്കി. വിജയികളെ പി.ടി.എ കമ്മിറ്റി അനുമോദിച്ചു. പി.ടി.എ പ്രസിഡന്റ് സി.കെ ശിഹാബ് അധ്യക്ഷനായി. ഹെഡ്മാസ്റ്റര്‍ ടി.എം മന്‍സൂര്‍, പി.എം അബൂബക്കര്‍, വി.കെ ദീപ, ഖാലിദ്ബ്‌നു അബ്ദുല്‍ അസീസ്, പി.പി രാജീവ്, ഉസ്മാന്‍ കാരാടന്‍ സംസാരിച്ചു.