അരീക്കോട്: അനധികൃതമായി മണല്‍ കടത്താന്‍ ഉപയോഗിക്കുന്ന വള്ളങ്ങളും വാഹനങ്ങളും പൊലിസ് പിടികൂടി. കഴിഞ്ഞ ദിവസം തൃശൂര്‍ റേഞ്ച് ഐ ജിയുടെ പ്രത്യേക നിര്‍ദ്ദേശ പ്രകാരം അരീക്കോട് എസ് ഐ കെ.സിനോദിന്റെ നേതൃത്വത്തില്‍ നടത്തിയ റെയ്ഡിലാണു വാഹനങ്ങളും വള്ളങ്ങളും പിടികൂടിയത്.
വടശ്ശേരി കടവില്‍ നിന്നു മൂന്നു വള്ളങ്ങളും ഓത്തു പള്ളിപ്പുറായയില്‍ നിന്ന് ഒരു ലോറിയുമാണു പൊലിസ് പിടിച്ചെടുത്തത്. പിടികൂടിയ 10 ലോഡ് മണല്‍ പൊലിസ് പുഴയില്‍ തന്നെ നിക്ഷേപിച്ചു. അനുമതിയില്ലാതെ രാത്രി കാലങ്ങളില്‍ അടക്കം മണല്‍ക്കടത്തു വ്യാപകമായതോടെയാണ് ഓപ്പറേഷന്‍ ചാലിയാറെന്ന പ്രത്യേക സ്‌ക്വാഡുമായി പൊലിസ് രംഗത്തിറങ്ങിയത്. വരുംദിവസങ്ങളില്‍ മണല്‍ മാഫിയയെ അമര്‍ച്ച ചെയ്യാനാവശ്യമായ നടപടികള്‍ ഊര്‍ജിതപ്പെടുത്തുമെന്ന് എസ് ഐ കെ.സിനോദ് പറഞ്ഞു.