നിലമ്പൂര്‍: ഏക സിവില്‍കോഡ് നടപ്പാക്കാനുള്ള നീക്കത്തില്‍ നിന്നും കേന്ദ്ര സര്‍ക്കാര്‍ പിന്‍മാറണമെന്ന് കേരളാ കോണ്‍ഗ്രസ് (എം) ചെയര്‍മാന്‍ കെ.എം മാണി. നിലമ്പൂരിലെ കണ്‍വന്‍ഷനില്‍ പങ്കെടുക്കാനെത്തിയ അദ്ദേഹം മാധ്യമങ്ങളോട് സംസാരിക്കുകയായിരുന്നു. ഓരോ സമുദായങ്ങള്‍ക്കും വ്യക്തിഗതനിയമം നിലവിലുള്ള രാജ്യത്ത് ഏക സിവില്‍കോഡ് നടപ്പാക്കാന്‍ ശ്രമിക്കുന്നത് ശരിയായ നടപടിയല്ലെന്നും പാര്‍ട്ടി ഏക സിവില്‍കോഡിന് എതിരാണെന്നും അദ്ദേഹം പറഞ്ഞു. സമുദായങ്ങളെ ഭിന്നിപ്പിച്ച് ഭരിക്കാനുള്ള ബി.ജെ.പി നീക്കം അപലപനീയമാണ്.  സംസ്ഥാനത്ത് സമാധാനം പുന:സ്ഥാപിക്കണമെങ്കില്‍ സി.പി.എമ്മും ബി.ജെ.പിയും കൊലക്കത്തികള്‍ താഴെവയ്ക്കണം. റബര്‍ വിലയിടിവിന് പരിഹാരം കാണുന്നതിന് താന്‍ കൊണ്ടുവന്ന വിലസ്ഥിരതാഫണ്ട് ഇടതുപക്ഷ സര്‍ക്കാര്‍ അട്ടിമറിക്കാന്‍ ശ്രമിക്കുകയാണ്. ഏഴ് മാസമായി കര്‍ഷകര്‍ക്ക് വിലസ്ഥിരതാഫണ്ടിന്റെ സബ്‌സിഡി വിതരണം ചെയ്യുന്നില്ലെന്നും അദ്ദേഹം പറഞ്ഞു.
കെ.എം മാണിയെ അപകീര്‍ത്തിപ്പെടുത്തുന്ന രീതിയിലുള്ള വാര്‍ത്തകള്‍ മാധ്യമങ്ങള്‍ക്ക്  നല്‍കിയതിന് പിന്നില്‍ വിജിലന്‍സാണെന്ന് പാര്‍ട്ടി വൈസ് ചെയര്‍മാന്‍ ജോസ് കെ. മാണി എം.പിയും ആരോപിച്ചു.