കൊച്ചി: കേരള പൊലിസില്‍ മൂന്നാംമുറ തിരിച്ചുവരികയാണോ എന്ന് സംശയിക്കുന്നതായി മുതിര്‍ന്ന കോണ്‍ഗ്രസ് നേതാവ് എ.കെ ആന്റണി. കൊല്ലത്ത് ദലിത് യുവാക്കളെ മര്‍ദിച്ചതില്‍ ആശങ്കയുണ്ട്. പൊലിസ് എന്നുകേട്ടാല്‍ ഇപ്പോള്‍ എല്ലാവര്‍ക്കും പേടിയാണ്. സ്റ്റേഷനില്‍ എത്തുന്നവരെ അകാരണമായി ക്രൂരമായി മര്‍ദിക്കുന്ന അവസ്ഥയാണുള്ളത്.
പൊലിസ് സ്റ്റേഷനില്‍ പോകുന്നവര്‍ക്ക് ജോലിചെയ്തു ജീവിക്കാന്‍ പറ്റാത്ത അവസ്ഥയാണ്.  ഇതിന് മാറ്റംവരണമെന്നും ആന്റണി ആവശ്യപ്പെട്ടു. കൊച്ചിയില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.
 ആര് ആരുടെ ഫോണ്‍ ചോര്‍ത്തിയാലും അംഗീകരിക്കാന്‍ കഴിയില്ല. ഫോണ്‍ വിളികള്‍ പരിശോധിക്കുന്നതിന് മാനദണ്ഡം ഏര്‍പ്പെടുത്തണമെന്നും വിജിലന്‍സ് ഡയറക്ടര്‍ ജേക്കബ് തോമസിന്റെ ഫോണ്‍ ചോര്‍ത്തിയതുമായി ബന്ധപ്പെട്ട ചോദ്യത്തിന്  മറുപടിയായി അദ്ദേഹം പറഞ്ഞു. ഉദ്യോഗസ്ഥരുടെതായാലും മാധ്യമപ്രവര്‍ത്തകരുടെതായാലും ഫോണ്‍ ചോര്‍ത്തുന്നത് അംഗീകരിക്കാനാകില്ലെന്നും അദ്ദേഹം കൂട്ടിച്ചേര്‍ത്തു.