കോഴിക്കോട്: നിയമവിരുദ്ധമായി കന്നുകാലികളെ കൊണ്ടുപോവുകയായിരുന്ന മിനിലോറി പൊലിസ് പിടികൂടി. ഇന്നലെ ഉച്ചയ്ക്കു മലപ്പുറം ഭാഗത്തു നിന്നും കണ്ണൂര്‍ ഭാഗത്തേക്കു പോവുകയായിരുന്ന വാഹനമാണ് തൊണ്ടയാട് ബൈപാസില്‍ മെഡിക്കല്‍ കോളജ് പൊലിസ് നടത്തിയ പരിശോധനക്കിടെ പിടികൂടിയത്.
സംഭവത്തില്‍ മൈസൂര്‍ ടിപ്പു സര്‍ക്കിള്‍ ബഡാമക്കാനി സ്വദേശി സല്‍മാന്‍ഖാനെ(20)തിരേ പൊലിസ് കേസെടുത്തു. മൃഗസംരക്ഷണ നിയമം 429 പ്രകാരമാണ് കേസ്.
സൊസൈറ്റി ഫോര്‍ പ്രിവന്റഡ് ക്രിയാലിറ്റി അഗനിസ്റ്റ് എഗെയ്ന്‍സ്റ്റ് ആനിമല്‍സ് (എസ്.പി.സി.എ) സെക്രട്ടറി അഡ്വ. എം. രാജന്‍, എസ്.പി.സി.എ ഇന്‍സ്‌പെക്ടര്‍ കെ. അജിത്കുമാര്‍ എന്നിവര്‍ മെഡിക്കല്‍ കോളജ് സ്‌റ്റേഷനിലെത്തി തെളിവെടുപ്പ് നടത്തി. എസ്.ഐ ഹബീബുല്ലയുടെ നേതൃത്വത്തിലാണ് വാഹനം പിടിച്ചെടുത്തത്.