തേഞ്ഞിപ്പലം: മാലിന്യ നിര്‍മാര്‍ജ്ജനത്തിനായി പഞ്ചായത്ത് ഭരണസമിതിക്കു കീഴില്‍ തേഞ്ഞിപ്പലം ഒരുങ്ങുന്നു. വീടും പുരയിടവും തെരുവുകളും പൊതുസ്ഥലങ്ങളും ശുചിത്വമുള്ളതാക്കി ഗ്രാമപഞ്ചായത്തിലെ ജനങ്ങളെ പകര്‍ച്ച വ്യാധികളില്‍ നിന്നും രക്ഷിക്കാനുള്ള പദ്ധതികളാവിഷ്‌ക്കരിച്ച് വാര്‍ഡ് മെമ്പര്‍മാരുടെ നേതൃത്വത്തില്‍ പ്രവര്‍ത്തനങ്ങള്‍ക്ക് തുടക്കം കുറിച്ചു.
ആദ്യ പടിയെന്നോണം മാലിന്യ നിര്‍മാര്‍ജ്ജന ബോധവത്കരണ നോട്ടീസ്  എല്ലാ വീടുകളിലും വിതരണം ചെയ്തുവരികയാണ്.
വീട്ടുവളപ്പില്‍ ഉപേക്ഷിച്ച പ്ലാസ്റ്റിക് കവറുകള്‍, ബോട്ടിലുകള്‍, കളിക്കോപ്പുകള്‍, ബോള്‍പെന്‍ തുടങ്ങിയ പ്ലാസ്റ്റിക് നിര്‍മിതമായ എല്ലാ അജൈവപാഴ് വസ്തുക്കളും  ശേഖരിച്ച് ഒരു ചാക്കില്‍ സൂക്ഷിക്കാനാണ് നിര്‍ദേശം.
മണ്ണില്‍ ലയിക്കാത്ത റെക്‌സിന്‍ ബാഗുകള്‍, ചില്ലുകള്‍, ചെരിപ്പുകള്‍ തുടങ്ങിയവയ്ക്ക് മറ്റൊരു ചാക്കും തയാറാക്കണം. ശേഖരിച്ചു വച്ച വസ്തുക്കള്‍ വാര്‍ഡ് റെസിഡന്‍സ് കോഡിനേഷന്‍ കമ്മിറ്റി എല്ലാ വീടുകളിലും നേരിട്ടെത്തി ശേഖരിച്ച് കര്‍ണാടകയിലെ പുന:ച്ചംക്രമണ കേന്ദ്രത്തിലേക്ക് എത്തിക്കും. ജൈവ പാഴ്‌വസ്തുക്കളായ ഭക്ഷണ അവശിഷ്ടങ്ങള്‍ ബയോഗ്യാസ്, പൈപ്പ് കമ്പോസ്റ്റ് , മണ്ണിര കമ്പോസ്റ്റ് എന്നിവയില്‍ നിക്ഷേപിക്കണം.
പഞ്ചായത്തിലെ മാലിന്യ നിര്‍മാര്‍ജ്ജനത്തിനായി കൂടുതല്‍ പദ്ധതികള്‍ ആവിഷ്‌ക്കരിച്ച് പ്രവര്‍ത്തനങ്ങള്‍ ഊര്‍ജ്ജിതപ്പെടുത്താനുള്ള നടപടികള്‍ നടന്നുവരുന്നതായി ഗ്രാമപഞ്ചായത്ത് പ്രസിഡന്റ് സഫിയ റാസാഖ് തോട്ടില്‍ പറഞ്ഞു.